کۆمپانیای ڕووسنەفتی ڕووسی دەڵێت 1.3 ملیار دۆلاری بە حکومەتی هەرێمی کوردستان داوە لە چوارچێوەی گرێبەستێـکدا کە لەم دوایـیانە مۆریکردووە و بەغدا بە توندی لە دژیەتی.
کۆمپانیاکە ئەمڕۆ سێشەممە لە ڕاپـۆرتی وەرزی سێـیەمی ئەمساڵی 2017ئەمەی ئاشکراکرد و گوتی لە چوارچێوەی گرێبەستێکیدایە لەگەڵ هەرێمی کوردستان بۆ کڕینی نەوتی خاو.
ئاژانسی دەنگ‌وباسی فڕانس پـرێس دەڵێت مانگی دە ڕووسنەفت ڕایگەیاند گرێبەستی لەگەڵ هەرێمی کوردستان واژوکردووە بۆ دابەشکردنی وەبەرهەمهێنانی نەوت لە 5 بیری نەوتدا کە لە ناوچە جێ ناکۆکی لەسەرەکاندان.
عێراق لای خۆیەوە لە زاری جەبار عەلی ئەللعێبی وەزیری نەوت بە توندی ڕەخنەی لەو گرێبەستە گرت و گوتی هەندێک بەرپـرس لە ناوەوە و دەرەوەی عێراق و هەروەها کۆمپانیای بیانیش باس لە گرێبەستی نەوت دەکەن لەگەڵ ئەم لایەن و ئەو لایەن لە ناو سنووری جوگرافی عێراق بەبێ ئاگاداری حکومەتی فیدراڵی و وەزارەتی نەوت، ئەمەش دەستێوەردانێکی ئاشکرایە لە کاروباری ناوخۆی عێراق و هەروەها کەمکردنەوەیە لە سەروەری عێراق و سەرپێچیـیە لە یاسا و ڕێسا نێودەوەڵەتیـیەکان.
گوتیشی بەپـێی دەستور تەنیا حکومەت و وەزارەتی نەوتی فیدراڵی مافی واژوکردنی گرێبەستی وەبەرهەمهێنانی نەوت و گازیان لە وڵاتەکەدا هەیە، بۆیە هەرچ گرێبەستێـکی دیکە بکرێت نایاسایـیە و دەوڵەتی عێراق پابەندی نابێت و لەگەڵ ئەوەشدا ماف بە حکومەت و وەزارەتی نەوت دەدات لە دادگاکانی ناوخۆ و هەروەها لە دادگا نێودەوڵەتیـیەکان ڕێوشوێنی یاسایی بگرێتەبەر.