Accessibility links

رۆژنامەنوسێکى کورد لە ناوچەیەکى ژێر دەسەڵاتى حەشدى شەعبى بەچەقۆ کوژرا


شەوى یەکشەممە لەسەر دووشەممە لە قەزاى داقوق ى باشورى کەرکوک، ئەرکان شەریف ى پەیامنێر و وێنەگرى کەناڵى کوردستان تى ڤى سەربە پارتى دیموکراتى کوردستان درایە بەرچەقۆ و گیانى لەدەستدا.

سەرچاوەیەک لەپۆلیسى قەزاى داقوق کە داوایکرد ناوى بڵاونەکرێتەوە، بەدەنگى ئەمەریکاى راگەیاند"ئەو پەیامنێرە کوردەى کە کوژراوە، چوار کەس رۆیشتونەتە نێو ماڵەکەى کەدەم و چاویان پێچراو بووە و بەچەقۆ کوشتویانە."

وتیشى"پەیامنێرە کوژراوەکە لەکاتى پرۆسەى ریفراندۆمدا بانگەشەى بۆ ریفراندۆم کردووە، ئەمەش وایکردووە گروپە میلیشیاکان رقى لێهەڵگرن."

کەناڵى کوردستان تى ڤى بڵاویکردەوە ئەو کەسانەى پەیامنێرەکەیانى کوشتووە سەربە حەشدى شەعبى بوون، هاوکات سەنتەرى میترۆ بۆ داکۆکى لەمافى رۆژنامەنوسان، رایگەیاند تیرۆر کردنى رۆژنامەنوس ئەرکان شەریف، زنجیرەیەکە لەتاوانى دەسەڵاتى عەسکەرى و میلیشیایى کە لەناوچەکانى پارێزگاى کەرکوک ئەنجام دەدرێت.

لاى خۆشیەوە عەقید ئەفراسیاو کامل ، وتەبێژى پۆلیسى کەرکوک ئەوەى بۆ دەنگى ئەمەریکا روونکردەوە کە تائێستا هیچ سەرەداوێکیان لەبارەى تاوانبارانى پشت روداوەکە دەستنەکەوتووە، وتى"رۆژنامەنوسەکە کێشەى شەخسى لەگەڵ هیچ کەسێکدا نەبووە."

تیرۆرکردنى ئەو رۆژنامەنوسە لەکاتێکدایە، حیزب و لایەنە کوردیەکان ئەو قەزایەیان جێهێشتووە، تەنها یەکێتى نیشتیمانى نەبێت کە بارەگاى لەنێو قەزاکەدا هەیە.

ئیدریس حاجى عادل بەرپرسى کۆمیتەى داقوق ى یەکێتى، بەدەنگى ئەمەریکاى راگەیاند"لەماوەى 15 رۆژى رابردوودا گازینۆیەکى کورد تەقێنراوەتەوە و بۆمب خراوەتە نێو ماڵى چەند کوردێکیشەوە."

وتیشى"چەکدارە شیعیەکان ناوەندى بریاریان نیە و لەچەندین گروپ پێکهاتوون، بۆیە نازانین مامەڵە لەگەڵ کێ دا بکەین."

قەزاى داقوق ى باشورى کەرکوک، دانیشتوانەکەى لەکورد و عەرەب و تورکمانى شیعەمەزهەب پێکهاتووە، کە ئەو قەزایە پێشتر لە ژێر دەسەڵاتى کورد و پۆلیسى عێراق دا بوو، بەڵام لەئێستادا هێزە شیعیەکان کۆنترۆڵیان کردووەو قایمقام و بەرێوەبەرى پۆلیسى قەزاکەیان لابردووە کەکورد بوون، دەیانەوێت تورکمانى شیعە بخەنە جێگەکانیان.

XS
SM
MD
LG