Accessibility links

شێرکۆ میروەیس: هێزى شاراوە لە ژێر ناوى داعشدا کاردەکەن


ئەندامێکى سەرکردایەتى یەکێتى، هۆشدارى دەدات لە خراپ بوونى دۆخى ئەمنى ناوچە کێشە لەسەرەکانى پارێزگاى دیالە، دەڵێت" هێزى شاراوە لە ژێر ناوى داعشدا، هێرش دەکەنە سەر گوندە کوردنیشینەکان."

لە گفتوگۆیەکدا لەگەڵ دەنگى ئەمەریکا، شێرکۆ میروەیس کە هاوکات پەرلەمانتارى عێراقیشە، رایگەیاند"هیچ هەماهەنگیەک نیـیە لە نێوان پێشمەرگە و سوپاى عێراق لە دەوروبەرى خانەقین، چونکە عێراق جدى نیـیە لە چارەسەرکردنى کێشەى ئەو ناوچانە."

شێرکۆ میروەیس، حکومەتى عێراقى تۆمەتبار کرد بەوەى بەدەنگەوە هاتنى نیـیە بۆ چارەسەرکردنى کێشەکانى دەوروبەرى خانەقین، لە کاتێکدا پێشتر گفتووگۆ و نەخشەرێگاى هاوبەش هەبووە بۆ ئەو مەبەستە.

سەرکردەکەى یەکێتى کە ماوەیەکى زۆر بەرپرسى مەڵبەندى حیزبەکەى بووە لە خانەقین، روونیکردەوە لە کۆى 93 گوندى دەوروبەرى خانەقین، سەرووى 20 گوندیان چۆڵکراون، چونکە هێزە عێراقیەکان ناوچەکەیان پێ ناپارێزرێت و نامۆن بە ناوچەکە.

دەربارەى قەبارەى مەترسیەکانى داعش لەسەر خانەقین و دەوروبەرى، شێرکۆ میروەیس نکۆڵى نەکرد لە جم و جۆڵى چەکدارانى سەربەو رێکخراوە، وتى"بەڵام هێزى شاراوەى تر بەناوى داعشەوە هێرش دەکەنە سەر گوندە کوردنیشینەکان، دەیانەوێت ناوچەکە تەعریب بکەنەوە و دانیشتوانەکەى دەربکەن."

لە کۆتایى قسەکانیدا بۆ دەنگى ئەمەریکا، شێرکۆ میروەیس روونیکردەوە فرە مەرجەعى و فرە هێزى لە ناوچە کوردستانیەکانى دیالە، ترس و دڵەڕاوکێى لاى خەڵکى ناوچەکە دروستکردووە، وتى"چەندین هێز لەو ناوچانە هەن، کەس قەڵەمى کەس ناخوێنێتەوە و کەس نازانێت کێ مەرجەعى کێ یە."

please wait

No media source currently available

0:00 0:04:24 0:00


XS
SM
MD
LG