وەزارەتى بەرگرى عێراق و وەزارەتى پێشمەرگە، بەردەوامن لە ئەنجامدانى روپێوى لە ناوچە کێشەلەسەرەکان. ئەمیندارى گشتى وەزارەتى پێشمەرگەش ئامانجى روپێویەکە بۆ دەنگى ئەمەریکا ئاشکرا دەکات.
رۆژى 11 ى ئەم مانگە، وەفدێکى هاوبەشى پێشمەرگە و سوپاى عێراق بۆ ئەنجامدانى روپێوى رۆیشتنە سنورى نێوان قەزاکانى کفرى و خورماتو، بەڵام بەشێک لە راگەیاندنەکان رۆیشتنى وەفدەکەیان بەسەرەتاى گەڕانەوەى پێشمەرگە بۆ ناوچە کێشەلەسەرەکان لێکدایەوە.
لیوا ئیسماعیل سەرحان ئەندامى لیژنە هاوبەشەکەى پێشمەرگەو وەزارەتى بەرگرى عێراق بۆ ئەنجامدانى روپێوی لە پارێزگاى دیالە و سەڵاحەدین، بەدەنگى ئەمەریکاى راگەیاند"لیژنەکەمان روپێوی لە پارێزگاى دیالە تەواو کردووە، ئەمڕۆ لە سنورى پارێزگاى سەڵاحەدینین بۆ روپێوى کردن."
لیوا ئیسماعیل سەرحان، رەتیکردەوە ئامانجى روپێوکردنەکە ئاشکرابکات، وتى"دواى دیالە و سەڵاحەدین، لیژنەکان سنورى کەرکوک و مەخمور تا موسڵ ڕوپێوى دەکەن."
بەڵام فەریق جەبار یاوەر، ئەمیندارى گشتى وەزارەتى پێشمەرگەى حکومەتى هەرێمى کوردستان، ئامانجى پێکهێنانى لیژنەى هاوبەشى لەلایەن وەزارەتى بەرگرى و وەزارەتى پێشمەرگە بۆ روپێوکردنى ناوچە کێشەلەسەرەکان بۆ دەنگى ئەمەریکا ئاشکراکرد، وتى"لەسەر بنەماى ئەو روپێویە، هێڵى پێشەوەى هێزەکانى پێشمەرگە و سوپاى عێراق دیارى دەکرێت."
وتیشى"ئەو ناوچانەى هێزیان زۆر تێدایە جا پێشمەرگە بێت یان سوپا دەیانکێشینەوە، ئەو ناوچانەش هەڕەشەى داعشیان لەسەرە، هێزیان تێدا زیاد دەکەین."
رۆژى 11 ى مانگ و لەکاتێکدا لیژنەکەى وەزارەتى پێشمەرگەو بەرگرى عێراق سەرقاڵى روپێوى بوون، پێشمەرگە هەوڵیدا چەند کیلۆمەترێک لەسنورى خورماتوەوە سەنگەرەکانى بباتە پێشەوە، بەڵام هێزە عێراقیەکان بە چوونە پێشەوەکەیان ڕازى نەبوون، بۆیە دواتر کشانەوە.
