Accessibility links

پارتى رەتیدەکاتەوە رێنمایى بۆ دەنگدان لە کەرکوک دابێتە لایەنگرانى


پارتى دیموکراتى کوردستان کە پرۆسەى هەڵبژاردنى پەرلەمانى عێراقى لەپارێزگاى کەرکوک بایکۆتکردووە، رەتیدەکاتەوە رێنمایى دابێتە لایەنگرانى حیزبەکەى، دەنگ بە کاندیدى هیچ حیزبێکى تر بدەن.

عەدنان کەرکوکى وتەبێژى ئەنجومەنى سەرکردایەتى پارتى لەکەرکوک، بەدەنگى ئەمەریکاى راگەیاند"ئەو زانیاریانە راست نین، گوایە ئێمە لایەنگرانى حیزبەکەمان راسپاردبێت تا دەنگ بە کاندیدى حیزب و لایەنى تر بدەن."

لەهەڵبژاردنى پێشوترى پەرلەمانى عێراقدا، پارتى لەپارێزگاى کەرکوک نزیکەى 63 هەزار دەنگى هێنا و بووە خاوەنى دوو کورسى، بەڵام هەڵبژاردنى ئەمجارەى لەکەرکوک بایکۆتکردووە.

هەرچەندە لەتۆڕە کۆمەڵایەتیەکان بڵاوکراوەتەوە کە گوایە پارتى رێنمایى داوەتە لایەنگرانى حیزبەکەى، تا دەنگ بەکاندیدى سۆسیالیست و یەکگرتوى ئیسلامى بدەن، بەڵام ئەو زانیاریانە رەتدەکرێتەوە.

جوان حەسەن سەرۆکى لیستى یەکگرتوى ئیسلامى لەکەرکوک، ئاماژەى بەوەکرد ئەوان کار لەسەر دەنگدەرى کەرکوک دەکەن، بەو پێیەى کوردێکى زۆر لە دوو پارتە دەسەڵاتدارەکە نیگەرانن، وتى"ئێمە دەمانەوێت دەنگدەرە نیگەرانەکان رازى بکەین تا دەنگمان پێبدەن، بۆ ئەوەى پێگەى کورد لەکەرکوک لاواز نەبێت."

لە هەڵبژاردنى پێشوى پەرلەمانى عێراقدا کورد لەکەرکوک 8 کورسى بەدەستهێنا، بەڵام پێشبینى دەکرێت لەم هەڵبژاردنەدا 4 بۆ 5 کورسى بەدەست بهێنێت.

please wait

No media source currently available

0:00 0:02:24 0:00

XS
SM
MD
LG