Accessibility links

هێزە شیعیەکان 20 خێزانى کوردیان له ‌خورماتو ناچارکرد گەڕەکە شیعەنیشینەکان جێبهێڵن


هێزەکانى حەشدى شەعبى ژمارەیەک خێزانى کورد ناچار دەکەن گەڕەکە شیعەنیشینەکانى قەزاى خورماتو جێبهێڵن ، بەرپرسانى کوردیش جەخت لەسەر خراپى دۆخى ئەو کوردانە دەکەن کە لەناوچەکانى ژێر کۆنترۆڵى حەشدى شەعبى دا دەژین.

کەریم شکور بەرپرسى بازنەى حەمرین ى یەکێتى، بەدەنگى ئەمەریکاى راگەیاند"لەماوەى دوو شەوى رابردوودا هێزە شیعیەکان 20 خێزانى کوردیان لەگەڕەکە شیعیەکانى خورماتو دەرکردووە."

ئەو گەڕەکانەى قەزاى خورماتوى پارێزگاى سەڵاحەدین کە لەژێر کۆنترۆڵى حەشدى شەعبیدان، بۆ عەرەب و تورکمانى سونە ئارام نین و تائێستا ژمارەیەکى زۆریان لەسەر دەستى هێزە شیعیەکان لێکوژراوە و رفێنراوە، بەشێوەیە لەئێستادا چارەنوسى 400 کەس لەخورماتو نادیارە کە هێزە شیعیەکان بە رفاندنیان تۆمەتبار دەکرێن.

عەلى حسێنى وتەبێژى حەشدى شەعبى، فشارخستنە سەر کوردانى خورماتوى لەلایەن حەشدى شەعبیەوە رەتکردەوە، بەدەنگى ئەمەریکاى راگەیاند"لەخورماتو هێزى هاوبەشى کورد و حەشد هەیە، گەر فشار دروستکراوە لەسەر کورد با ئەو هێزە هاوبەشە قەبوڵى نەکەن."

لەبەرانبەردا کەریم شکور، ئاماژەى بەوەکرد هێزە شیعیەکان فرە دەنگ و رەنگن و ئەوان نازانن لەسەر مەسەلەى فشارخستنە سەر کوردەکان گفتوگۆ لەگەڵ چى گروپێکى شیعى دا بکەن.

قەزاى خورماتوى پارێزگاى سەڵاحەدین، یەکێکە لەو ناوچانەى زۆرترین گرفتى لەنێوان کورد و شیعە تێیدا رویداوە و چەندین کەس لەهەردوولا کوژراون و برینداربوون.

XS
SM
MD
LG