Accessibility links

وەفدێکى نەتەوە یەکگرتوەکان سەردانى قەزاى خورماتوى کرد


ئەمڕۆ پێنجشەمە وەفدێکى نەتەوە یەکگرتوەکان سەردانى قەزاى خورماتوى پارێزگاى سەڵاحەدین ى کردو لەبارەى خێزانە کوردە ئاوارەکان و سوتان و تەقاندنەوەى ماڵەکانیان و گرژیەکانى قەزاکە، گفتووگۆیان لەگەڵ حەشدى شەعبى دا کرد.

عەلى حسێنى وتەبێژى میحوەرى باکورى عێراقى حەشدى شەعبى، بەدەنگى ئەمەریکاى راگەیاند"وەفدى نەتەوە یەکگرتوەکان پرسیاریان هەبووە و ئێمەش وەڵاممان داونەتەوە، پرسيارەکانیان لەسەر مەسەلەى ئاوارەکان و شەڕ و ئاڵۆزیەکانى قەزاکە بوو."

وتەبێژەکەى حەشدى شەعبى، ئاماژەى بەوەشکرد لە وەڵامى وەفدى نەتەوە یەکگرتوەکاندا، ئەوان وەکو حەشدى شەعبى وتویانە کوردەکانى خورماتویان دەرنەکردووە، ئەوان خۆیان رۆیشتون و لاریان نیە لەگەڕانەوەیان، وتى"بەداخەوە شەو و رۆژى 16 ى ئوکتۆبەر تەنها لەخورماتو شەڕ روویدا، چونکە کوردەکان چەکدارى خۆبەخشیان هەبووە."

سەبارەت بە چۆنیەتى مامەڵەکردنى حەشدى شەعبى لەگەڵ چەکدارە کوردە خۆبەخشەکاندا، عەلى حسێنى وتى"ئەوان لەلایەن دادگاوە داواکراون، چونکە خۆیان ڤیدیۆى خۆیان بڵاودەکەنەوە و لەکەناڵەکانەوە هەڕەشە دەکەن، بەشەوان خورماتو هاوەنباران دەکەن و بەقەناس خەڵک بریندار دەکەن."

لەبەرانبەردا چەکدارێکى کوردى خۆبەخشى خورماتو، بەدەنگى ئەمەریکاى راگەیاند"چەکدارانى حەشدى تورکمانیش لاى ئێمە داواکراون و دەبێت دەستگیربکرێت، چونکە ئەوان ماڵى خەڵکیان سوتاندووە و تەقاندۆتەوە و لێیان کوشتوین."

سەردانەکەى ئەمرۆى وەفدى نەتەوەیەکگرتوەکان بۆ خورماتو، لەکاتێکدایە رۆژى سێشەمەى رابردوو ژمارەیەک لە کوردانى خورماتو چونەتە بەردەم نەتەوە یەکگرتوەکان لەهەولێر، نارەزایەتیان دەربرى و حەشدى شەعبیان بە سوتاندن و تەقاندنەوەى ماڵەکانیان و ئاوارەبونیان تۆمەتبار کرد.

XS
SM
MD
LG