فەرماندەیەکى باڵاى حەشدى شەعبى، دەڵێن ئەوان لەڕووى سیاسیەوە بەسەر قەزاى خانەقینى پارێزگاى دیالەدا باڵادەست بوون، بۆیە لەنێوان کورد و حەشدى شەعبى دا خوێن نەرژاوە.
ئەبو مونتەزر فەرماندەى میحوەرى خانەقینى حەشدى شەعبى، بەدەنگى ئەمەریکاى راگەیاند"بارودۆخى خانەقین باشە، چونکە ئێمە ئەنجامدانى کارى سەربازیمان دژى کورد و پێشمەرگە قەدەغە کردووە، سیاسیەن بەسەر دۆخەکەدا باڵادەست بووین."
وتیشى"رێنمایى دراوەتە هێزەکانى حەشدى شەعبى جم و جۆڵى چەکدارى لە ناوخانەقیندا قەدەغەیە، بۆ ئەوەى کێشەمان توش نەبێت."
زۆربەى دانیشتوانە کوردەکەى قەزاى خانەقین کوردى شیعە مەزهەبن و ژمارەیەک لەگەنجانى خانەقینیش پێشتر پەیوەندیان بەحەشدى شەعبیەوە کردبوو،لەئێستادا هێزە کوردیەکەى حەشد بۆ خانەقین گەڕاوەتەوە.
کوردبوونى هێزەکانى حەشد و ڕوونەدانى گرژى لەخانەقین، وایکردووە ئەو قەزایە سیما کوردیەکەى لەدەست نەدات و تائێستاش ئاڵاى کوردستان لەزۆربەى جێگەکان دەشەکێتەوە، هەروەها هەماهەنگى لەنێوان حەشد و کورددا هەیە لەو قەزایە.
عەمید نەجمەدین عومەر فەرماندەى لیواى 3 ى پێشمەرگە کە بارەگاکەیان لەنزیک خانەقینە، بەدەنگى ئەمەریکاى راگەیاند"پێکهاتەى دانیشتوانى خانەقین کوردى شیعە مەزهەبە و ئێمەش هەماهەنگیمان لەگەڵ حەشدى شەعبى دا هەیە، هەرئەمەش هۆکارى خوێن نەرژان بوو لەخانەقین."
قایمقام و بەرێوەبەرى پۆلیس و زۆربەى بەرپرسە ئیداریەکانى خانەقین کوردن، تائێستا لەلایەن عێراقەوە هیچ بەرپرسێکى کورد لەپۆستەکەى لانەبراوە.