Accessibility links

سەرۆکى ئەنجومەنى سیاسى عەرەبى سونە: رازى نابین پێشمەرگە و حەشد لە کەرکوک کێشە دروستبکەن


Kerkuk

سەرۆکى ئەنجومەنى سیاسى عەرەبى لە کەرکوک دەڵێت، حکومەتى عێراق ئامادەکارى بۆ شەڕى رزگارکردنى حەویجە نەکردووە، جەخت لەسەر ئەوەش دەکاتەوە ئەوان وەکو عەرەبى سونە رازى نابن حەویجە گرفت لەنێوان پێشمەرگە و حەشدى شەعبى دا دروست بکات.

ئیسماعیل حەدیدى، سەرۆکى ئەنجومەنى سیاسى عەرەبى لە کەرکوک، بەدەنگى ئەمەریکاى راگەیاند"وەکو عەرەبى سونە رازى نابین پێشمەرگە و حەشدى شەعبى کێشە لە کەرکوک دروست بکەن."

وتیشى"پێمانخۆشە پێشمەرگە و حەشدى شەعبى هەماهەنگى یان لەگەڵ یەکترى هەبێت و پێکەوە حەویجە رزگاربکەن."

ئیسماعیل حەدیدى، ئاماژەى بە خراپى بارودۆخى دانیشتوانى حەویجە کرد بەوەى ئەو خەڵکەى لەو ناوچانە ماونەتەوە لەدۆخێکى خراپدان، وتى"ژمارەى چەکدارەکانى داعش بەگشتى نازانین، بەڵام لە دەوروبەرى ناحیەى رەشاد و سنورى داقوق 350 چەکدار دەبن."

بەبرواى حەدیدى، چەکدارەکانى داعش لە حەویجە توشى دڵەراوکێ‌ بوون و لە خەمى داهاتوى خێزانەکانیاندان، هەربۆیە شەڕى بەرگرى دەکەن و تواناى هێرش کردنیان لەدەستداوە.

سەبارەت بەوادەى دەستپێکردنى شەڕى حەویجە، سەرۆکى ئەنجومەنى سیاسى عەرەبى لەکەرکوک، دەڵێت"تائێستا وادەى دەستپێکردنى شەڕى حەویجە دیارى نەکراوە و حکومەتى عێراق هەر رۆژە و قسەیەک دەکات، بەڵام پێدەچێت شەڕى حەویجە بخرێتە دواى تەلەعفەر."

داواکارى سەرەکى عەرەبى سونە لەکەرکوک ڕزگارکردنى قەزاى حەویجەى رۆژئاواى کەرکوکە، پێشمەرگەش دەیەوێت لەشەڕى حەویجەدا رۆڵى هەبێت و پلانى حکومەتى عێراقیش بۆ چۆنیەتى شەڕى حەویجە ڕوون نیە.

XS
SM
MD
LG