Accessibility links

وه‌زیرى كۆچ و كۆچبه‌رانى عێراق: ئاواره‌كانى حه‌ویجه‌ بۆ پارێزگاى سه‌ڵاحه‌دین ده‌برێن


وەزیرى کۆچ و کۆچبەرانى عێراق، ئاماژه ‌بەوەدەکات ئامادەکارى تەواویان بۆ پێشوازیکردن لە ئاوارەکانى قەزاى حەویجەى رۆژئاواى کەرکوک کردووە، جەخت لەسەر ئەوەشدەکاتەوە زۆربەى ئاوارەکان بەرەو پارێزگاى سەڵاحەدین دەبرێن نەک کەرکوک.

دکتۆر دەرباز محەمەد وەزیرى کۆچ و کۆچبەرانى عێراق، بەدەنگى ئەمەریکاى راگەیاند"پێدەچێت حەویجە 50 هەزار بۆ 80 هەزار خەڵکى سڤیلى تێدا مابێتەوە."

وتیشى"تائێستا نازانین ئەو هاوڵاتیانەى لەناو حەویجەدان، چەندێکیان خەڵکى ناوچەکانى ترى عێراقن، چونکە لە قەزاو ناحیەکانى ترى سەڵاحەدین و موسڵەوە خەڵک رۆیشتونەتە حەویجە."

ئیدارەى کەرکوک کۆبونەوەى لەگەڵ رێکخراوە نێو دەوڵەتیەکان دا ئەنجامداوە بۆ گەیاندنى دەستى خزمەتگوزارى بەئاوارەکان، بەپێى ئامادەکاریەکانیش ئاوارەکان نابرێنە نێو کەرکوک بەڵکو لەکامپەکانى دەرەوەى شاردا نیشتەجێ دەکرێن.

وەزیرى کۆچ و کۆچبەرانى عێراق، ئاماژەى بەوەکرد زۆربەى ئاوارەکانى حەویجە دەبرێنە کامپ لە باکورى پارێزگاى سەڵاحەدین، هەروەها نزیکەى هەزار خێزانیشیان لەسنورى کەرکوک جێیان دەکرێتەوە.

یەکێک لەو مەترسیانەى لاى سەرکردەکانى عەرەبى سونە و رێکخراوە نێودەوڵەتیەکانیش دروستبوە، کوشت و بڕکردنى دانیشتوانى حەویجە و وێرانەکردنى ناوچەکەیانە لەلایەن هێزە شیعیەکانەوە.

لەو بارەیەوە دکتۆر دەرباز محمەد، روونیکردەوە حکومەتى عێراق بەرنامەیەکى چڕى داناوە بۆ ئەوەى کەمتر هاوڵاتى سڤیل لەکاتى شەڕدا زیانى بەربکەوێت، وتى"هەوڵدەدرێت شەڕەکە گەر دواشبکەوێت، بەڵام دەست پارێزى لەخەڵکى سڤیل بکرێت."

لەماوەى ساڵى رابردوودا بەهەزاران هاوڵاتى دانیشتوى حەویجە بەرێگەى قاچاخ ژێر دەسەڵاتى داعشیان بەرەو کەرکوک بەجێهێشتووە، بەڵام ماوەى چەند مانگێکە داعش رێوشوێنى توندى گرتوەتە بەر و رێگرى لەهەڵاتنى دانیشتوانى ئەو قەزایە کردووە.

XS
SM
MD
LG