هێزەکانى پۆلیسى داقوق لە باشورى کەرکوک 7 چەکدارى داعشیان دەستگیرکرد، کاتێک دەیانویست لە ڕێگەى ئاوارەکانەوە خۆیان بگەیەننە نێو شارى کەرکوک و لە ئێستادا لێکۆڵینەوەیان لەگەڵ دەکرێت.
عەمید کاوە غەریب بەڕێوەبەرى پۆلیسى داقوق ، بە دەنگى ئەمەریکاى راگەیاند"بەشێکى زۆر لە کەس و کارى چەکدارانى داعش خۆیان گەیاندوەتە ناوچە ئارامەکان و بە تایبەت نێو کامپەکان."
وتیشى"چەکدارەکانى داعش دەیانەوێت لەرێگەى ئاوارەکانەوە خۆیان رزگار بکەن و خۆیان بگەیەننە ناوچە ئارامەکان."
بەپێى وتەى بەڕێوەبەرى پۆلیسى داقوق ، لە چەند رۆژى رابردوودا زانیاریان پێگەیشتوە لەسەر خۆخزاندنى ژمارەیەک چەکدارى داعش بە ڕیزى ئاوارەکان ، بۆیە بۆسەیان لە چەند جێگەیەک داناوە.
عەمید کاوە وتى"7 چەکدارى داعشمان لەنێو ئاوارەکاندا دەستگیرکردووە ، کە یەکێک براى پلان داڕێژەرى هێرشەکەى سەر کەرکوک بووە."
سەبارەت بەهۆکارى خۆخزاندنى ئەو چەکدارانە بەنێو ئاوارەکان، عەمید کاوە وتى"لێکۆڵینەوەیان لەگەڵ دەکەین بۆ ئەوەى بزانین بۆچى داعشیان جێهێشتووە ، ویستویانە واز بهێنن یان شوێن گۆرکێیان کردووە."
کاتێک لەمانگى ئۆکتۆبەرى ساڵى رابردوو داعش هێرشى کردە سەر شارى کەرکوک ، سەرەتا بەرپرسانى ئەو شارە پێیانوابوو چەکدارەکان لەنێو کامپى ئاوارەکانەوە پلانی هێرشەکەیان دارشتبوو، بەتایبەت پێشتر فەرماندەکانى پێشمەرگە پێشبینى دزەکردنى چەکدارانى داعشیان لەرێگەى ئاوارەکانەوە کردبوو.