Accessibility links

فڕۆکەکانى هاوپەیمانان بارەگاکانى داعش لە نزیک کەرکوک بۆمباران دەکەن


وێنەی ئەرشیف

شەوى سێشەممە فڕۆکەکانى هاوپەیمانان ژمارەیەک بارەگاى داعشیان لە ناوچەکانى باشورى کەرکوک بەچڕى بۆردومانکرد و بە پێى وتەى فەرماندەکانى پێشمەرگە، بۆردومانەکان بووەتە هۆى لەباربردنى هێرشى داعش بۆ سەر سەنگەرەکانیان.

لیوا هیوا ڕەش جێگرى فەرماندەى باشورى کەرکوکى هێزى پێشمەرگە، بەدەنگى ئەمەریکاى ڕاگەیاند"ئەو بارەگایانەى بۆردومانکراون لەلایەن تیمێکى بیانیەوە دەستنیشانکراون بەو پێیەى جم و جۆڵى داعشیان تێدا بەدیکراوە."

وتیشى"لە ئەنجامى بۆردومانى فڕۆکەکانى هاوپەیمانان زیاتر لە 20 چەکدارى داعش کوژراون."

هەرکات هێزەکانى داعش و جم و جۆڵیان هەبێت بە ئاراستەى سەنگەرەکانى پێشمەرگە، فرۆکەکانى هاوپەیمانان دێنە خەت و چەکدارەکانى داعش لەو ناوچانە بۆمباران دەکەن، کە زۆرجار بۆمبارانى فڕۆکەکان بووەتە هۆى شکستپێهێنانى پلانەکانى داعش.

ئازاد جەبارى سەرۆکى لیژنەى ئەمنى لەئەنجومەنى پارێزگاى کەرکوک، پێیوایە سورانەوەى فرۆکەکانى هاوپەیمانانى بەئاسمانى ناوچەکانى دەوروبەرى کەرکوک و بۆمباران کردنى چەکدارەکانى داعش ، بوەتە هۆى لەباربردنى هێرشى داعش بۆ سەر سەنگەرەکانى پێشمەرگە.

جەبارى وتى"هەرکات داعش نیازى هێرشى هەبێت فرۆکەى هاوپەیمانان لەرێگەى بۆردومانکردنیانەوە پلانەکانى شکست پێهێناون."

بۆردومانى چڕى بارەگاکانى داعش لەلایەن فرۆکەکانى هاوپەیمانانەوە ، لە کاتێکدایە دوێنێ‌ دەنگى ئەمەریکا بڵاویکردوەتەوە کە داعش جم و جۆڵى هەیە و هێزێکى 50 چەکدارى بردووەتە نزیک گوندى بەشیرى باشورى کەرکوک.

XS
SM
MD
LG