Accessibility links

داعش تاوەرێکی کارەبا لە نێوان جەلەولا و قەرەتەپە دەتەقێنێتەوە


شەوى دووشەممە لەسەر سێشەممە چەکدارانى داعش چەند تاوەرێکى کارەبایان لە نێوان ناحیەکانى جەلەولا و قەرەتەپەى پارێزگاى دیالە تەقاندەوە، هەر لە هەمان ناوچەش بەهۆى بۆمبى چێنراوەوە 5 ئەندامى خێزانێک گیانیان لەدەستدا.

محەمەد عومەر، بەرپرسى کۆمیتەى قەرەتەپەى یەکێتى، بەدەنگى ئەمەریکاى راگەیاند"لەماوەى ئەم هەفتەیەدا ئەمە دووەم جارە داعش تاوەرە کارەباکانى نێوان جەلەولا و قەرەتەپە بۆمبڕێژ دەکات."

وتیشى"چەند تاوەرێکى کارەبا بەهۆى بۆمبى داعشەوە تەقیونەتەوە و چەند تاوەرێکى ترى بۆمبڕێژکراویش لەلایەن تیمەکانى هەڵگرتنەوەى مینەوە پوچەڵکراونەتەوە."

هاوکات لەگەڵ بۆمبڕێژکردنى تاوەرەکانى کارەبادا، داعش لەچەند رێگەیەکى سەرەکیش بۆمبى چێنراویان داناوە، بەو هۆیەوە 5 ئەندامى خێزانێک کە لەباوک و دایک و سێ‌ منداڵ پێکهاتبوون ئەمرۆ گیانیان لەدەستدا.

محەمەد سامان بەڕێوەبەرى ئاسایى ناحیەى جەلەولا، بەدەنگى ئەمەریکاى راگەیاند"داعش بۆیە تاوەرەکانى کارەبا دەتەقێنێتەوە، تا بەشەوان کارەبا لەناوچەکە ببرێت و سود لە تاریکى شەو بۆ کارى تیرۆریستى وەربگرێت."

تەقاندنەوەى تاوەرکانى کارەبا لەناوچەکانى نێوان ناحیەکانى جەلەولا و قەرەتەپە، لەکاتێکدایە ئەو ناوچانە لەژێر کۆنترۆڵى پێشمەرگەدان و پان و بەرینى ناوچەکە وایکردووە بە ئاسانى کۆنترۆڵ نەکرێن.

please wait

No media source currently available

0:00 0:02:10 0:00

XS
SM
MD
LG