Accessibility links

فەرماندەى میحوەرى رۆژئاواى کەرکوک: شەڕى حەویجە بۆ دواى گشتپرسى دوادەخرێت تا وەکو کارتى فشار بەکاربهێنرێت


فەرماندەى میحوەرى رۆژئاواى کەرکوکى هێزى پێشمەرگە، دەڵێت حکومەتى عێراق دەیەوێت شەڕى حەویجە بۆ دواى مەسەلەى ئەنجامدانى گشتپرسى دوابخات، تا وەکو کارتى فشار بەرانبەر هەرێمى کوردستان بەکارى بهێنێت.

لیوا محەمەد رێگر، کە لەجێگەى دکتۆر کەمال کەرکوکى وەکو فەرماندەى میحوەر دەست بەکاربووە، بەدەنگى ئەمەریکاى راگەیاند"کاتى دەستپێکردنى شەڕى حەویجە نزیک نیە ، چونکە شەڕ لەموسڵ زۆرى ماوە و سوپاى عێراقیش ماندووە."

وتیشى"حکومەتى عێراق دەیەوێت شەڕەکە بۆ دواى مانگى ئەیلولى ئەمساڵ دوابخات ، بۆ ئەوەى وەکو کارتى فشار بەرانبەر مەسەلەى گشتپرسى بەکارى بهێنێت."

هەندێک لەبەرپرسانى ئەمنى باس لە کۆبونەوەى هێزێکى زۆرى داعش لەقەزاى حەویجەى رۆژئاواى کەرکوک دەکەن ، بەتایبەت لەئێستادا چەکدارەکانى ئەو رێکخراوە جم و جۆڵیان زۆر هەیە و کەم شەو هەیە لەسنورى قەزاى خورماتوەوە هێرش نەکەنە سەر پێشمەرگە، بەڵام لیوا محەمەد رێگر ئەوەى رەتکردەوە.

لیوا محەمەد وتى"داعش ژمارەیان زیادى نەکردووە، هەر گوندێکى دەوروبەرى حەویجە 5 بۆ 7 چەکدارى داعش زیاترى تێدا نیە."

پێشتر کچێک لەناو شارى کەرکوکدا رفێنرا، دواتر دوو گەنجى نزیک لە حەشدى شەعبى بەتۆمەتى رفاندنى دەستگیرکران ، هەروەها چەکدارێکى ترى حەشدیش لەناو کەرکوکدا دەستگیرکرا کە بۆمب لەنێو ئۆتۆمبێلەکەیدا بوو، بەرپرسانى کورد هەندێک بەرپرسى حەشدیان بەئەنجامدانى جم و جۆڵ بۆ نانەوەى پشێوى تۆمەتبار کرد، بەڵام دواتر بەرپرسانى حەشد تۆمەتەکەیان رەتکردەوە و روداوەکانیان بەسیناریۆ وەسفکرد.

لەو باریەوە فەرماندەى میحوەرى رۆژئاواى کەرکوک ، پێیوابوو ئامانج لە جم و جۆڵە نامۆکان بۆ تێکدانى دۆخى ئەمنى کەرکوک رێگرتنە لە ئەنجامدانى گشت پرسى ، بەڵام شکست دەهێنن.

جەختکردنەوەى فەرماندەکانى پێشمەرگە لەسەر دواخستنى شەڕى حەویجە و هەوڵدان بۆ تێکدانى دۆخى ئەمنى کەرکوک ، لەکاتێکدایە حەیدەر عەبادى سەرۆک وەزیرانى عێراق پێشتر رایگەیاندبوو شەڕى حەویجە نزیکە و دژایەتى حکومەتەکەشى بۆ راپرسى پیشاندا.

XS
SM
MD
LG