Accessibility links

ئێران دەڵێت دوو کەسی لەسەر تاوانی ئابوری لەسێدارەداوە


ئێران دەڵێت 2 کەسی لەسێدارەداوە لەسەر ئەنجامدانی تاوانی ئابوری، ئەمەش لەم کاتەی ئابوری وڵاتەکە دووچاری گرفتی گەورە بووەتەوە هاوکاتی نوێبوونەوەی سزاکانی ئەمەریکا بەسەریدا.

ماڵپەڕی میزانی سەر بە دەسەڵاتی دادوەری ئێران ئەمڕۆ چوارشەممە ڕایگەیاند هەر یەک لە وەحید مەزڵومین و محەمەد ئیسماعیل قاسمی لەسێدارەدران لەسەر تاوانی " افساد فی الارض"، ئەمەش دەستەواژەیەکە لە لایەن دەسەڵاتدارانی ئێرانەوە بەکاردەهێنرێت بۆ سزادانی کەسێک بە ئیعدام.

بەپـێی دادوەری ئێران مەزلومین و قاسمی تۆڕی گەندەڵیـیان پـێکهێنابوو و کۆسپیان بۆ سیستەمی ئابوری و دارایی وڵاتەکە دروستکردبوو.

ئاژانسی ئیسنای ئێران دەڵێت مەزڵومین 2 تۆن ئاڵتونی پـێگیراوە.

جێی ئاماژەیە لەوتای مانگی هەشتەوە چەندان دادگای تایبەت لەسەر کەیسی ئابوری و دارایی لە ئێران پـێکهێنراون بە ڕەزامەندی عەلی خامەنەئی ڕابەری باڵای ئێران کە گەورەترین دەسەڵاتە لە وڵاتەکەدا.

لەو کاتەوە هەتا ئێستا بە لایەنی کەم بڕیاری لەسێدارەدانی 7 کەس دراوە لە ڕێگەی ئەو دادگایانەوە. هەندێک لەو دادگاییکردنانە ڕاستەوخۆ لە ڕێگەی تەلەفیزیۆنەوە بڵاوکرانەوە.

چاودێران دەڵێن ئامانجی ڕژێمی ئێران لەم سزایانە چاوترساندنی خەڵکە و هەروەها هۆکاری خراپـبوونی باری ئابوری وڵاتەکە بخرێنە ئەستۆی چەند کەسێکەوە.

XS
SM
MD
LG