وتەبێژی وەزارەتی دەرەوەی ئێران ناسر کەنعانی دەڵێت گفتوگۆکانی نێوان ئێران و عەرەبستانی سعودیە " ئەرێنی " بوون، ئاماژەشی بەوەدا تاران و ڕیاز گرنگییان داوە بە ئەنجامدانی کۆبوونەوەی زیاتر.
لە مانگی چواردا دەزگای هەواڵی نور نیوزی ئێران بڵاویکردەوە ئێران و سعودییە لە بەغدادی پایتەختی عێراق گفتوگۆکانی نێوانیان دەستپێکردۆتەوە.
هەر لە هەمان مانگدا سەرۆک وەزیری عێراق مستەفا کازمی لە چاوپێکەوتنێکدا وتی کۆتایی گرژییە درێژخایەنەکانی نێوان ئێران و سعودیە نزیک بۆتەوە.
لە ماوەی چەند ساڵی ڕابردوودا عێراق میوانداری پێنج خولی گفتوگۆکانی نێوان ئێران و سعودیەی کردووە، ئامانج لە گفتوگۆکانیش ئاساییکردنەوەی پەیوەندییەکانی نێوان سعودیە و ئێرانە.
سەرچاوە/ ڕۆیتەرز