ئەنجومەنی ئاسایشی نێودەوڵەتی سەر بە نەتەوە یەکگرتووەکان دووبارە ئەنتۆنیۆ گۆتیرێشیان وەکو سکرتێری گشتی نەتەوە یەکگرتووەکان پەسەند کردەوە.
گۆتیرێشی تەمەن 72 ساڵ کە پێشتر سەرۆک وەزیری پورتوگال بووە لە ساڵی 2017 ەوە پۆستی سکرتێری گشتی نەتەوە یەکگرتووەکانی وەرگرتووە و لە خولی دووەمیشدا ڕووبەڕووی هیچ ڕکابەرێک نەبۆوە.
نزیکەی 10 کەسی دیکە ئارەزووی پۆستەکەیان دەکرد، بەڵام بە فەڕمی کاندید نەبوون چونکە هیچ کام لە 193 وڵاتەکەی ئەندام لە نەتەوە یەکگرتووەکان پشتیوانیان لێنەکردن.
سەرۆکی ئێستای ئەنجومەنی ئاسایشی نێودەوڵەتی سڤین یۆرگنسنی باڵیۆزی ئیستۆنیا وتی لە دانیشتنێکی کورتی داخراودا ئەندامانی ئەنجومەنی ئاسایشی نێودەوڵەتی بە تێکڕا پێشنیاری ئەوەیان کرد گۆتیرێش دووبارە وەکو سکرتێری گشتی نەتەوە یەکگرتووەکان هەڵبژێردرێتەوە.
سەرچاوە/ فرانس پرێس