Accessibility links

هه‌ڵبژاردنی په‌رله‌مانی له‌ یۆنان ئه‌مڕۆ یه‌کشه‌ممه‌ به‌ڕێوه‌ده‌چێت


ئه‌مڕۆ یه‌کشه‌ممه‌ بنکه‌کانی ده‌نگدان له‌ یۆنان کراوه‌ ده‌بن له‌ کاتژمێر 7 ی به‌یانی هه‌تا 7 ی ئێواره‌ تاوه‌کو ڕێگه‌ به‌ نزیکه‌ی 9.9 ملیۆن یۆنانی بدرێت که‌ مافی ده‌نگدانیان هه‌یه‌ په‌رله‌مانی نوێی وڵاته‌که‌یان هه‌ڵبژێرن.

ئه‌مه‌ش دووباره‌کردنه‌وه‌ی ئه‌و هه‌ڵبژاردنه‌یه‌ که‌ له‌ 6 ی مانگی پـێـنجدا سـازکرا و له‌ ئاکامدا هیچ کام له‌ پارته‌ براوه‌کان نه‌یانتوانی حکومه‌تی نوێی وڵاته‌که‌ له‌ ماوه‌ی یاسایی خۆیدا پـێکبهێنن.

قه‌یرانی ئابوری وڵاته‌که‌ باڵی به‌سه‌ر پـرۆسه‌ی هه‌ڵبژاردنه‌که‌دا کێشـاوه‌ و چاودێران ده‌ڵێن سه‌خته‌ ئه‌نجامه‌کان پـێشـبینی بکرێن.

به‌پـێی ڕاوه‌رگرتنه‌کانی ئه‌و دوایـیه‌ که‌ 15 ڕۆژ له‌مه‌وبه‌ر ڕێـگه‌ به‌ بڵاوکردنه‌وه‌ی ئه‌نجامه‌کانی درا، هه‌ردوو ڕکه‌به‌ری سه‌ره‌کی پارتی دیموکراتی نوێی پارێزکار و پارتی سیریزای چه‌پی توندڕه‌و یه‌کسـانن.

ئێلێکس تسیپـراس سه‌رۆکی پارتی سیریزا مه‌رجه‌کانی ڕزگارکردنی ئابوری یۆنان ڕه‌تده‌کاته‌وه‌ ئه‌وانه‌ی‌ دانراون بۆ کۆمه‌کی دارایی وڵاته‌که‌.

شیکه‌ره‌وان ده‌ڵێن ئه‌گه‌ربێت و چه‌په‌ڕه‌وه‌کان له‌م هه‌ڵبژاردنه‌ی ئه‌مڕۆ یه‌کشه‌ممه‌دا سه‌رکه‌وتن به‌ده‌سـتبهێنن ئه‌وا ڕه‌نگه‌ وڵاته‌که‌ ناچار بکه‌ن ده‌سـتبه‌رداری دراوی یورۆ بـبێت و بگه‌ڕێته‌وه‌ بۆ به‌کارهێنانی دراوی درخمه‌ که‌ پـێشـتر یۆنان بۆ 2500 سـاڵ کاری پـێـکردووه‌.

به‌ڵام ئه‌نتۆنیس ساماراس ڕێبه‌ری پارتی دیموکراتی نوێی پارێزکار ڕه‌خنه‌ له‌م سیاسه‌ته‌ی ئێلێکس تسیپـراس ده‌گرێت و ده‌ڵێت ئه‌مه‌ هێنده‌ی دیکه‌ باری ئابوری وڵاته‌که‌ خراپـتر ده‌کات.

جێی ئاماژه‌ پـێـکردنه‌ یۆنانیـیه‌کان نایانه‌وێت وڵاته‌که‌یان ده‌سـتبه‌رداری یورۆ بـبێت، به‌ڵام له‌ هه‌مان کاتیشـدا به‌ مه‌رجه‌کانی پـلانی ڕزگارکردنی ئابوری قایل نین و ده‌ڵێن ئه‌وه‌ زیان به‌ چینه‌ هه‌ژاره‌کانی وڵاته‌که‌ ده‌گه‌یه‌نێت.

XS
SM
MD
LG