Accessibility links

ئەڵمانیا داوا لە سەڕاج و حەفتەر دەکات ئامادەی کۆنگرەیەک بن سەبارەت بە لیبیا


خەلیفە حەفتەر

ئەڵمانیا جەختی لەوە کردەوە ڕۆژی یەکشەممە لە بەرلین میوانداری کۆنگرەیەک دەکات بەمەبەستی پشتیوانیکردنی هەوڵەکانی نەتەوە یەکگرتووەکان بۆ خستنەوەی ئاشتی و ئاشتەوایی لە لیبیا.

حکومەتی ئەڵمانیا لە بەیاننامەیەکدا وتی لەنێو بەشداربووانی کۆنگرەکەدا هەریەک لە نوێنەرانی ئەمەریکا و ڕوسیا و بەڕیتانیا و فەڕەنسا و چین و تورکیا و ئیتاڵیا و نەتەوە یەکگرتووەکانی تێدایە.

ئاماژەشی بەوەدا بانگهێشتی سەرۆکی حکومەتی لیبیا فائیز سەڕاج و خەلیفە حەفتەری سەرکردەی هێزەکانی ڕۆژهەڵاتی لیبیای کردووە.

جێی ئاماژەیە هێزەکانی خەلیفە حەفتەر کۆنتڕۆڵی ڕۆژهەڵاتی لیبیا و باشووری وڵاتەکەیان کردووە و هێرشەکانیان چڕکردۆتەوە بۆ سەر تەڕابلسی پایتەختی وڵاتەکە، هەریەک لە میسڕ و ئیماڕات و ڕوسیا پشتیوانی لێدەکەن.

لە ماوەی ڕابردوودا بە نێوەندگیری ڕوسیا و تورکیا لە مۆسکۆ دانوستانێک سەبارەت بە ڕەوشی لیبیا ساز کرا و هەریەک لە سەڕاج و خەلیفە حەفتەر بەشداریان تێدا کرد، لە کۆتای دانوستانەکاندا ڕێکەوتنی ئاگربەست واژۆکرا، بەڵام خەلیفە حەفتەر بەبێ ئەوەی ڕێکەوتنەکە واژۆ بکات مۆسکۆی بەجێهێشت.

سەرچاوە/ ڕۆیتەرز

XS
SM
MD
LG