سەرۆکی فەڕەنسا ئیمانوێل ماکرۆن وتی پێویستە یەکێتی ئەوروپا ڕۆڵی نێوەندگیری نەبینێت لە ناکۆکییەکانی نێوان ئیسپانیا و کەتەلۆنیادا و متمانەی خۆی دەربڕی بە مەدرید کە دەتوانێت مامەڵە لەگەڵ ڕەوشەکەدا بکات.
ماکرۆن لە میانەی سەردانەکەیدا بۆ فرانکفۆرتی ئەڵمانیا کە وابڕیارە لەگەڵ ڕاوێژکاری ئەڵمانیا ئانگێلا مێرکڵدا کۆببێتەوە وتی " ئەوە کاروباری ناوخۆی ئیسپانیایە."
هەروەها لە وەڵامی پرسیارێکدا ماکرۆن وتی وەکوو سەرۆکێک هیچ هۆکارێک نابینێت ببێتە نێوەندگیر لە کاروباری وڵاتێکی دراوسێدا. وتیشی " ئەوە کاری من نیە."
لەلای خۆشیانەوە یەکێتی ئەوروپا دووبارە داوای لە ئیسپانیا کردەوە لەڕێی گفتوگۆکردنەوە کۆتایی بە ناکۆکییەکان بهێنن.
وتەبێژی نوێنەرانی یەکێتی ئەوروپا وتی " داوامان لە هەموو لایەنەکانی ئیسپانیا کردووە بە زووترین کات کێشەکان چارەسەر بکەن و دەست بکەن بە گفتوگۆ کردن."
سەرچاوە/ ڕۆیتەرز