Accessibility links

وەزیری دارایی فەڕەنسا داوا لە ئەمەریکا دەکات کۆتایی بە ناکۆکییەکە بازرگانیەکان بهێنێت لەگەڵ ئەوروپادا


وەزیری دارایی فەڕەنسا برونو لومێخ

وەزیری دارایی فەڕەنسا برونو لومێخ داوای لە ئەمەریکا کرد کۆتایی بە ناکۆکییە بازرگانییەکان بهێنێت لەگەڵ ئەوروپادا، جەختیشی لەوە کردەوە فەڕەنسا و یەکێتیەکی ئەوروپای بەهێز لە بەرژەوەندی ئەمەریکادایە.

لە چاوپێکەوتنێکیدا لەگەڵ دەزگای هەواڵی فرانس پرێس، لومێج وتی " پەیامی من بۆ بەڕێوبەرایەتیەکەی ئەمەریکا لەسەر ئەم کێشە بازرگانیانە زۆر ڕوونە. با بەزووترین کات کۆتایی بەم گرژییانە بهێنین لەنێوان ئەمەریکا و ئەوروپادا."

ناکۆکییەکانی نێوان ئەمەریکا و ئەوروپا لەسەر پۆڵا و ئەلەمینۆمە.

سەرۆکی پێشووی ئەمەریکا دانۆڵد ترامپ لە مانگی شەشی ساڵی 2018 دا لە سەدا 25 باجی گومرگی خستەسەر پۆڵا و لە سەدا 10 باجی گومرگی خستەسەر ئەلەمینۆم، هۆکارەکەشی گەڕاندەوە بۆ نیگەرانیەکانی ئاسایشی نیشتیمانی ئەمەریکا. ئەوەش بووە هۆی ئەوەی ئەوروپا وەڵام بداتەوە.

لومێخ وتی " ئێستا پێشڕەوییەک هەیە لە گفتوگۆ بازرگانییەکاندا، بەڵام هێشتا بەربەست ماون."

ئەمەریکا و ئەوروپا تاوەکو 1 ی مانگی دوانزەیان لەبەردەستدایە ناکۆکییەکان چارەسەر بکەن.

لومێخ پێشنیاری ئەوەیکرد ئەمەریکا و ئەوروپا لە چەند مانگێکی کەمدا هەوڵ بدەن چارەسەرێک بدۆزنەوە بۆ ئەوەی خۆیان لە مەترسی جەنگێکی بازرگانی بەدووربگرن.

وتی " ململانێکان پێویست نین. "

جەختیشی لەوە کردەوە " ئەوروپایەک کە زیاتر سەربەخۆ بێت و تەکنەلۆجیای خۆی هەبێت، ئەوە دژی ئەمەریکا نیە، ئەوە باشە بۆ ئەمەریکا."

وتیشی " فەڕەنسا هاوپەیمانێکی متمانەپێکرا و بەهێزی ئەمەریکایە لە ئەوروپادا، شوێنێکی گرنگیشە بۆ وەبەرهێنانەکانی ئەمەریکا، بەڵام بەداخەوە پەیامەکە هەمووکات لە واشتن بەوشێوەیە لایان ڕوون نیە."

سەرچاوە/ فرانس پرێس

XS
SM
MD
LG