وەزیری ژێرخانی ئۆکرانیا ئۆلیکساندەر کوبراکۆڤ دەڵێت یەکەم کەشتی بیانی گەیشتۆتە ئۆکرانیا، ئەمەش بۆ یەکەمین جارە لە دوای دەستپێکردنی داگیرکارییەکەی ڕووسیاوە لە ئۆکرانیا کەشتییەکی بیانی بگاتە ئۆکرانیا.
ڕووسیا و ئۆکرانیا بە سەرپەرشتی نەتەوە یەکگرتووەکان و تورکیا ڕێکەوتوون لەسەر دووبارە دەستپێکردنەوەی هەناردەکردنی گەنمی ئۆکرانیا بۆ بازاڕەکانی جیهان.
دوای ئەوەی نەتەوە یەکگرتووەکان هۆشداریدا لەسەر مەترسی کەوتنەوە و بڵاوبوونەوەی برسێتی لە جیهاندا بەهۆی ڕاگرتنی هەناردەکردنی گەنمی ئۆکرانیاوە، تورکیا و نەتەوە یەکگرتووەکان نێوەندگرییان کرد بۆ گەیشتن بە ڕێکەوتنێک لە نێوان ڕووسیا و مۆسکۆدا بۆ دووبارە کردنەوەی بەندەرەکانی ئۆکرانیا لەسەر دەریای ڕەش و دەستپێکردنەوەی هەناردەکردنی گەنمی ئۆکرانیا بۆ دەرەوە.
پێش داگیرکارییەکەی ڕووسیا، ئۆکرانیا و ڕووسیا نزیکەی سێیەکی گەنمی جیهانیان دابین کردووە.
کوبراکۆڤ وتی کەشتی فولمار ئێس کە ئاڵای باربادۆسی بەسەرەوەیە لە بەندەری چۆرنۆمۆرسکی ئۆکرانیایە.
وتیشی " هەمووشتێک دەکەین تاوەکو دڵنیا ببینەوە لەوەی بەندەرەکانمان بتوانن کەشتی زیاتر وەربگرن و مامەڵەیان لەگەڵدا بکەن، پلانمان هەیە لە ماوەی دوو هەفتەدا بگەینە ئەو ئاستەی بتوانین ڕۆژانە لانیکەم 3 بۆ 5 کەشتی بەڕێبکەین."
وتیشی " ئەم ڕووداوە ئاماژەیەکی گرنگی بازاڕە لەسەر ئەوەی ڕێکەوتنی هەناردەکردنی گەنمەکە پارێزراوە و لەوەش گرنگتر دەرفەتێکی کارێکی بە قازانجە بۆ خاوەن کەشتییەکان تاوەکو بگەڕێنەوە بۆ بەندەرەکانی ئۆکرانیا."
وتیشی ئامانجی ئۆکرانیا ئەوەیە لە کۆتاییدا بتوانێت مانگانە 3 ملیۆن تەنم گەنم لە بەندەرەکانی دەریای ڕەشەوە هەناردەی دەرەوە بکات.
نزیکەی 20 ملیۆن تەن گەنمی ساڵی ڕابردوو لە ئۆکرانیا گیریخواردووە و بەهۆی داگیرکارییەکەی ڕووسیاوە لەو وڵاتە نەتوانراوە هەناردەی دەرەوە بکرێت.
سەرچاوە/ ڕۆیتەرز