سەرچاوەیەکی ئاسایشی میسر و سەرچاوەیەکی تەندروستی ئەو وڵاتە بۆ ئاژانسی دەنگوباسی ڕۆیتەرزیان ڕاگەیاند لەسەر کەناری دەریای سوور لە ئوتێلێـکی ناوچەی غەردەقەی گەشتیاری لە ڕۆژهەڵاتی میسر 2 گەشتیاری ئەڵمانی کە ژن بوون بە چەقۆ کوژراون.
پـێشتر وەزارەتی ناوخۆی میسر لەسەر فەیسبوکی خۆی ڕایگەیاند ئەمڕۆ هەینی کەسێـک بە چەقۆوە هێرشی کردووەتە سەر گەشتیاران لە یەکێـک لە ئوتێلەکانی غەردەقە و لە ئاکامدا 6 گەشتیار برینداربوون کە هەموویان ژنن. بریندارەکان ڕەوانەی نەخۆشخانە کراون و هێرشبەرەکە دەسـتگیرکراوە و ئێستا لێکۆڵینەوەی لەگەڵدا دەکرێت تاوەکو هۆکاری هێرشکردنەکەی بزانرێت.
وەزارەتەکە دەشڵێت لێکۆڵینەوە سەرەتایـیەکان نیشانیانداوە هێرشبەرەکە لە کەنارێکی گشتی پاڵ ئوتێلەکە دزەی بۆ شوێنی گەشتیارەکان کردووە و تاوانەکەی ئەنجامداوە.
جێی ئاماژەیە کەرتی گەشتیاری لە میسر کاریگەریـیەکی زۆری بەسەر ئابوری هەیە. چەندان جار لەلایەن گروپە توندەڕەوکانەوە گەشتیارانی بیانی کراونەتە ئامانج.