Accessibility links

ئەنجومەنی وەزیرانی میسر ڕەزامەندی دەردەبڕێت لەسەر ڕاگەیاندنی باری نائاسایی لە وڵاتەکەیاندا


ئەنجومەنی وەزیرانی میسر دەڵێت ڕەزامەندی لەسەر بڕیارەکەی سەرۆکی وڵاتەکەیان دەربڕیوە بۆ ڕاگەیاندنی باری نائاسایی لە سەرانسەری وڵاتەکە بۆ ماوەی 3 مانگ، ئەمەش پاش ئەوەی ڕۆژی یەکشەممە دوو کڵێسا بە بۆمب کرانە ئامانج و لە ئاکامدا 44 کەس گیانیان لەدەسـتدا.

ئەنجومەنەکە لە بەیانـنامەیەکدا ئەمڕۆ دووشەممە ڕەزامەندیـیەکەی بۆ بڕیارەکەی سەرۆک عەبدول ئەلفەتاح ئەلسیسی ڕاگەیاند و نووسیوەیەتی" لە چوارچێوەی تەواوکردنی ڕێوشوێنە دەسـتوری و یاسایـیەکان، ئەنجومەنی وەزیران لە کۆبوونەوەی ئەمڕۆیدا بە سەرۆکایەتی ئەندازیار شەریف ئیسماعیل ڕەزامەندی لەسەر بڕیارەکەی سەرۆک کۆمار بۆ ڕاگەیاندنی باری نائاسایی لە سەرانسەری وڵات بۆ ماوەی 3 مانگ ڕاگەیاند و لە کاژمێر یەکی پاش نیوەڕۆی ئەمڕۆ دووشەممەوە دەسـتپـێدەکات."

هەروەها تیایدا هاتووە" بە پـێی بڕیارەکە هێزە چەکدارەکان بە لەشکر و پـۆلیس و ئاسایش ئەرکی جێبەجێکردنی بڕیارەکە لە ئەستۆ دەگرن و ڕێوشوێنی پـێویست دەگرنەبەر بۆ ڕووبەڕووبوونەوەی مەترسیـیەکان تێرۆر و پاراستنی ئاسایش و گیانی هاوڵاتیان و سەروەت و سامانی گشتی و تایبەت لە تەواوی وڵاتەکە."

دوو هێرشەکەی دوێنێی سەر کڵێسای مار جۆرجیس لە شاری تەنتا و کڵێسای مارکس لە شاری ئەسکەندەریـیە و بوونە کوژرانی 44 کەس و برینداربوونی 126 کەسی دیکە، وایان لە سەرۆکی میسر کرد باری نائاسایی لە وڵاتەکە ڕابگەیەنێت و بڕیار بدات هێزەکانی لەشکر لە پاڵ هێزەکانی پـۆلیس دامودەزگا گرنگەکانی وڵاتەکە بپارێزن. هەروەها بڕیاری دا ئەنجومەنێـکی باڵا دابمەزرێت بۆ نەهێشتنی توندڕەوی و تێرۆرزم لە میسردا.

بەپـێی دەستوری میسر دەبێت پەرلەمانیش لە ماوەی حەوت ڕۆژدا بڕیاری خۆی لەسەر ڕاگەیاندنی باری نائاسایی بدات.

XS
SM
MD
LG