دانیمارک ڕایگەیاند 15 دیبلۆماتکاری ڕووسی دەردەکات، ئەوەش بە هەماهەنگی لەگەڵ وڵاتانی دیکەی یەکێتی ئەوروپادا کە هەمان هەنگاوییان گرتۆتەبەر. ئەم دەرکردنانەش دوای هەواڵی دۆزینەوەی گۆڕی بە کۆمەڵ و کوشتنی هاوڵاتیانی مەدەنی دێت لە شارۆچکەی بوچای ئۆکرانیا.
وەزیری دەرەوەی دانیمارک یێپێ کۆفۆد بە ڕۆژنامەنووسانی وت " ئەمە نمونەیەکی دیکەی دڕندەیی و توندوتیژی و تاوانەکانی جەنگە، کە وادیارە لە بوچا ڕوویداوە."
ئەم هەنگاوەی دانیمارک دوای ئەوە دێت هەندێک لە وڵاتانی دیکەی وەکو ئەڵمانیا و فەڕەنسا و ئیتاڵیا وتیان دیبلۆماتکارانی ڕووسی دەردەکەن.
وەزارەتی دەرەوەی دانیمارک وتی وڵاتەکەی نایەوێت پەیوەندییە دیبلۆماتییەکان لەگەڵ ڕووسیادا ببڕێت و باڵیۆزی ڕووسیا لە وڵاتەکە و کارمەندانی باڵیۆزخانەکە بەشێک نین لەوانەی کە دەردەکرێن.
دەزگای هەواڵگری و ئاسایشی دانیمارک لە ماوەی ڕابردوودا لەم ساڵدا لە ڕاپۆرتێکدا وتی باڵیۆزخانەی ڕووسیا کۆمەڵێک ئەفسەری هەواڵگری وەرگرتووە کە کاری سیخوڕی دەکەن.
کۆفۆد وتی " دەمانەوێت پەیامێکی ڕوون بنێرین بۆ ڕووسیا کە سیخوڕیکردن لەسەر خاکی دانیمارک جێی قبوڵکردن نیە."
سەرچاوە/ ڕۆیتەرز