Accessibility links

چین خۆی بەدوور دەگرێت لە سەرکۆنەکردنی ڕووسیا


وتەبێژی وەزارەتی دەرەوەی چین وانگ وێنبین

سەرەڕای زیادبوونی هێرشەکانی ڕووسیا بۆ سەر ئۆکرانیا، ڕۆژی هەینی چین دووبارە جەختی لە هەڵوێستی خۆی کردەوە و ڕەتی کردەوە ئەم کارەی ڕووسیا بە " داگیرکردن " ناودێر بکات، یاخود ڕەخنە لە مۆسکۆ بگرێت.

چین جەختی لەوە کردەوە باوەڕی بە ڕێز گرتن هەیە لە سەروەری خاکی سەرجەم وڵاتان، بەڵام وتی بابەتی ئۆکرانیا ئاڵۆزی خۆی هەیە و پێشینەیەکی مێژوویی تایبەتی هەیە.

وتەبێژی وەزارەتی دەرەوەی چین وانگ وێنبین بە ڕۆژنامەنووسانی وت " لە نیگەرانییە یاساییە ئەمنییەکانی ڕووسیا تێدەگەین."

وانگ ڕەخنەی لە لێدوانەکانی سەرۆکی ئەمەریکا جۆو بایدن گرت لەسەر ئەوەی هەر وڵاتێک پشتیوانی لە داگیرکارییەکەی ڕووسیا بکات ئەوا " پەڵەی چوونە پاڵ ڕووسیای " لەسەر دەبێت، وانگ وتی ئەو وڵاتانەی کە دەستیان وەرداوەتە کاروباری ناوخۆیی وڵاتانی دیکەوە دەبینن کە ناوبانگیان پەڵەدار بووە.

لە ماوەی ڕابردوودا ئەمەریکا و بەڕیتانیا و ژاپۆن و کەنەدا و ئوستڕاڵیا و یەکێتی ئەوروپا سەپاندنی سزای ئابووری زیاتریان بەسەر ڕووسیادا ئاشکرا کرد، ئەڵمانیاش پڕۆژەی بۆری گازی نۆرد ستریم 2 ی ڕووسی ڕاگرت.

کاتێکیش پرسیاری لێکرا سەبارەت بەوەی ئایا چین وەکو وەڵامێک بۆ سزاکانی ئەمەریکا و یەکێتی ئەوروپا، ئامادەیە سوتەمەنی زیاتر لە ڕووسیا بکڕێت، وانگ وتی " سزاکان هەرگیز ڕێگەیەکی کاریگەر نەبوون بۆ چارەسەرکردنی کێشەکان. هیوادارین لایەنە پەیوەندیدارەکان بتوانن هەوڵی تەواوی خۆیان بدەن لەڕێی گفتوگۆ و ڕاوێژەوە کێشەکان چارەسەر بکەن."

سەرچاوە/ ڕۆیتەرز

XS
SM
MD
LG