دەسەڵاتدارانی فەڕەنسا دەڵێن هێزی تایبەتی وڵاتەکەیان لە ئۆپەراسیۆنێکدا 4 بارمتەیان لە باکوری بورکینا فاسۆ ڕزگارکردووە.
کۆشکی سەرۆکایەتی فەڕەنسا (ئێلیزێ)، ئەمڕۆ هەینی بەیاننامەیەکی لەم بارەیەوە بڵاوکردەوە و نووسیویەتی ئۆپەراسیۆنەکە شەوی ڕابردوو ئەنجامدراوە و 4 بارمتە ڕزگارکراون کە دووانیان گەشتیاری فەڕەنسایـین و یەکێکیان ئەمەریکیـیە و ئەوی دیکەیان خەڵکی کۆریای باشورە. بەڵام دوو سەربازی فەڕەنسایی لە میانەی ئۆپەراسیۆنەکدا کوژران.
ئیمانۆئێل ماکرۆن سەرۆکی فەڕەنسا دەستخۆشی لە لەشکری وڵاتەکەی کرد و لە هەمان کاتدا سەرەخۆشی لە کەسوکاری هەردوو سەربازەکە کرد.
خانم فلۆغۆنس پاغلی وەزیری بەرگری فەڕەنسا ئەویش لە ڕاگەیاندنێکدا باسی لە ئۆپەراسیۆنەکە کرد و سوپاسی دەسەڵاتدارانی هەردوو وڵاتی بەنین و بورکینا فاسۆی کرد کە لە ئۆپەراسیۆنەکە یارمەتیان دابوو. هەروەها سوپاسی ئەمەریکاشی کرد بۆ ئەو هاوکاریـیەی کردوویەتی. بەپـێی لەشکری فەڕەنسا، ئەمەریکا زانیاری هەواڵگری پـێداون.
لەشکری فەڕەنسا گوتیشی 4 لە ڕفیندەرەکان لە میانەی ئۆپەراسیۆنەکەدا کوژران.
جێی ئاماژەیە هەردوو گەشتیارە فەڕەنسایـیەکە لە سەرەتای مانگی پـێنج ڕفێندران کاتێک بۆ گەشتکردن چووبوون بۆ پارکی نشتیمانی پەنجاری.