Accessibility links

بایدن پێشنیاری مانەوەی دانیشتوانی هۆنگ کۆنگ دەکات لە ئەمەریکا


سەرۆکی ئەمەریکا جۆو بایدن

سەرۆکی ئەمەریکا جۆو بایدن پێشنیاری " پەناگەیەکی پارێزراوی " لە ئەمەریکا کرد بۆ هەزاران کەس لە دانیشتوانی هۆنگ کۆنگ و مانەوەیان لە ئەمەریکا بۆ ماوەی 18 مانگ، لەجیاتی ئەوەی ڕووبەڕووی سەرکوتکردن ببنەوە لەڕێی ڕەوانەکردنەوەیان بۆ هۆنگ کۆنگی ژێر دەسەڵاتی چین.

بایدن ڕەخنەی توندی لە هەڵمەتەکانی چین گرت بۆ سەرکوتکردنی دیموکراسی لە هۆنگ کۆنگ کە ماوەی 14 مانگە بەردەوامە، وتی لە بەرژەوەندی سیاسەتی دەرەوەی ئەمەریکادا بوو ڕێگە بە دانیشتوانی هۆنگ کۆنگ بدرێت لە ئەمەریکا بمێننەوە و کاربکەن.

بەدیاریکراوی هێشتا نەزاندراوە ئەو بڕیارە چەند کەس دەگرێتەوە، بەڵام بەرپرسێکی باڵای بەڕێوبەرایەتیەکەی بایدن وتی زۆرینەی ئەو 300,000 هاوڵاتیەی هۆنگ کۆنگ کە لە ئەمەریکا دەژین بڕیارەکە دەیانگرێتەوە و دەتوانن لە ئەمەریکا بمێننەوە، جگە لەو کەسانەی کە تۆمەتبار کراون بە ئەنجامدانی تاوانی گەورە.

بایدن لە بڕیارەکەیدا وتی لە ماوەی ساڵی ڕابردوودا و بە تۆمەتی جیا جیا، لانی کەم 100 ڕابەری ئۆپۆزسیۆن و چالاکەوان و خۆپیشاندەر لەلایەن بەرپرسانی چینەوە دەستبەسەرکراون، زیاتر لە 10,000 کەسی دیکەش بەهۆی خۆپیشاندانیانەوە دژی حکومەت دەستگیرکراون.

بایدن وتی " ئەمەریکا پابەندە بە سیاسەتێکی دەرەوە کە بەها دیموکراسی و ئامانجەکانی سیاسەتی دەرەوەمان یەکبخات، ئەوەش بەرگریکردنە لە دیموکراسی و پشتیوانیکردنە لە مافەکانی مرۆڤ لە سەرانسەری جیهاندا."

بایدن ئاماژەشی بەوەدا " پێشنیارکردنی پەناگەیەکی پارێزراو بۆ ئەو هاوڵاتیانەی هۆنگ کۆنگ کە ئازادییەکانیان لە هۆنگ کۆنگ لێسەندراوەتەوە، بەرژەوەندییەکانی ئەمەریکا لە ناوچەکەدا زیاتر دەکات، ئەمەریکا سوورە لەسەر پشتیوانیکردنی گەلی هۆنگ کۆنگ."

وتەبێژی کۆشکی سپی جێن ساکی وتی ئەمەریکا بە توندی دژایەتی بەکارهێنانی یاسای ئاسایشی نیشتیمانی چین دەکات لە هۆنگ کۆنگ کە " ئامانج لێی ڕەت کردنەوەی مافە سەرەتایی و ئازادییەکانە و هەروەها هێرشکردنە سەر سەربەخۆیی و لاوازکردنی پڕۆسە و دامەزراوە دیموکراسیەکانی هۆنگ کۆنگە."

سەرچاوە/ دەنگی ئەمەریکا

XS
SM
MD
LG