وەزیری دارایی بەلجیکا ڕایگەیاند وڵاتەکەی 6 منداڵ دەهێنێتەوە کە لە کەمپەکانی ژێر دەسەڵاتی بەڕێوەبەرایەتی کوردی سوریادان و باوانیان هاوڵاتینامەی بەلجیکایان هەبووە و پەیوەندیان بە داعشەوە کردبوو و کوژراون.
ئەلێکسەندەر دی کرو ئەمڕۆ پـێنجشەممە بە ڕادیۆی VRT ی وڵاتەکەی گوت، لە میانەی کۆبوونەوەیەکی حکومەت بڕیاردراوە ئەو منداڵانە بهێنرێنەوە کە چواریان تەمەنیان سەروو 10 ساڵەوەیە.
گوتیشی ئەم منداڵانە لە بەلجیکا لەدایکبوون و بە خواستی خۆیان بۆ ئەوێ نەچوون و ئێستا بە تەنیا لە نێو کەمپەکاندا دەژین و هیچ کەسێکیان نیـیە.
ئەمە یەکەم جارە بەلجیکا بڕیارێکی لەم شێوەیە بدات.
ساڵی 2017 حکومەتی بەلجیکا گوتی کارئاسانی دەکات بۆ گەڕاندنەوەی ئەو منداڵانەی تەمەنیان خوار 10 ساڵەوەیە و بەڵگەیان هەبێت هاوڵاتینامەی بەلجیکایان هەیە.
بەڵام لە کۆتایی ساڵی 2018 حکومەتی بەلجیکا تانەی لە بڕیاری دادگایەکی وڵاتەکەی گرت کە داوای لێدەکرد 6 منداڵی خوار تەمەن 6 ساڵ بگەڕێنێتەوە.
بەپـێی چەند سەرچاوەیەک هێشتا زیاتر لە 50 نەوجەوانی بەلجیکایی لە نێو کەمپەکانی هۆل و عەین عیسای ژێر دەسەڵاتی کوردی سوریادان.
بەلجیکا یەکێکە لەو وڵاتانەی ئەوروپا کە زۆرترین کەس لێوەی پەیوەندی بە گروپە توندڕەوەکانی سوریاوە کردبوو، لەوانە داعش.