دەزگاکانی ڕاگەیاندن لە جەزائیر دەڵێن ژمارەی کوژراوانی ئاکامی کەوتنی فڕۆکە لەشکریـیەکە لە نزیک بنکەی لەشکری بوفاریک لە باشوری ڕۆژئاوای جەزائیری پایتەخت گەیشتە 257 کەس.
بەپـێی کاربەدەستان و گەواهیدەران کە بۆ کەناڵەکان لێدوانیان داوە، بەیانی ئەمڕۆ چوارشەممە فڕۆکەیەکی بارهەڵگری لەشکری جۆری Ilyushin Il-76 ی ڕووسیایی لە بنکەی لەشکری بوفاریک هەستاوە و ئاگر بەربووەتە باڵی ڕاستی، هەرچەندە فڕۆکەوانەکە هەوڵی دابوو دەستبەجێ بەرەو فڕۆکەخانەکە بگەڕێتەوە، بەڵام هەوڵەکەی بێ ئاکام بووە و لە کێڵگەیەکی نزیک فڕۆکەخانەکە کەوتووەتە خوارێ.
لە لایەکی دیکە سەرچاوەیەکی لەشکری بە ئاژانسی دەنگوباسی فڕانس پـرێسی گوتووە ئەم جۆرە فڕۆکەیە شوێنی 120 سەرنشینی تێدایە. ئەگەر بێت و ئەو ژمارانە پـشتڕاستبکرێنەوە، واتە فڕۆکەکە دوو هێندەی توانای خۆی سەرنشینی هەڵگرتبوو.
فەریق ئەحمەد قاید ساڵح جێگری وەزیری بەرگری جەزائیر گەیشتە شوێنی ڕووداوەکە و هاوکات ژمارەیەکی ئێجگار زۆر لە کارمەندانی فریاکەوتن و پـۆلیس و سەرباز سەرقاڵی دەرهێنانی تەرمی قوربانیـیەکانبوون و بە دەیان ئەمبوڵاس تەرمەکانیان بەرەو نەخۆشخانەکان دەگواستەوە.