Accessibility links

دکتۆر نه‌جمه‌دین که‌رێم سه‌باره‌ت به‌ هه‌ڵـبژاردنه‌کانی کوردسـتان و مه‌سه‌له‌ی ده‌سـتوره‌که‌ی ده‌دوێت


دکتۆر نه‌جمه‌دین که‌ریم سه‌رۆکی ئه‌نسـتتیوتی کوردی له‌ واشـنتن چه‌ند ڕۆژێـکه‌ له‌ هه‌رێمی کوردسـتان گه‌ڕاوه‌ته‌وه‌ و له‌ نزیکه‌وه‌ چۆنێتی به‌ڕێوه‌چوونی هه‌ڵـمه‌ته‌کانی هه‌ڵـبژاردنی هه‌ڵـسه‌نگاندووه‌.

دکتۆر نه‌جمه‌دین ده‌ڵێت ئه‌مه‌ بۆ یه‌که‌م جاره‌ له‌ هه‌رێمی کوردسـتاندا جگه‌ له‌ لیسـتی هه‌ردوو حزبه‌ گه‌روه‌که‌ و حزبه‌ ئیسلامیـیه‌کان لیستێـکی تر له‌ کایه‌دایه‌ که‌ خه‌ڵـک ته‌ماشـای ده‌کات، بۆیه‌ به‌ بۆچوونی من ژماره‌یه‌کی زۆری خه‌ڵـک به‌شـداری له‌م هه‌ڵـبژاردنه‌دا ده‌که‌ن. ده‌شڵێت هه‌روه‌ها بوونی ئه‌م لیسـتانه‌ بۆته‌ هۆی به‌ڕێوه‌چوونی هه‌ڵـمه‌ته‌کانی هه‌ڵـبژاردن به‌ شـێوه‌یه‌ک که‌ کوردسـتان پـێشـتر به‌خۆیه‌وه‌ نه‌یدیوه‌.

دکتۆر نه‌جمه‌دین له‌ درێژه‌ی قسه‌که‌یدا ده‌ڵێت ئێمه‌ ئه‌وه‌ به‌ هه‌نگاوێـکی باش ده‌زانین بۆ پـێشـخسـتنی دیموکراتیـیه‌ت له‌ کوردسـتاندا، هه‌روه‌ها ده‌نگدانه‌وه‌یه‌کی باشی له‌ جیهاندا ده‌بێت، به‌ڵام هه‌ڵـبه‌ته‌ پـێویسـته‌ هه‌موو کاره‌کان سـنووری هه‌بێت، چ ڕه‌خنه‌گرتن و چ قسه‌کردن ده‌رباره‌ی که‌موکوڕیـیه‌کان و ده‌شبێت دور بێت له‌ توندوتیژی و به‌ شـێوه‌یه‌کی کراوه‌ ئه‌نجام‌بدرێت تا کورد بۆ هه‌موو خه‌ڵـکی دونیای نیشـان‌بدات که‌ کوردسـتان بڕوای به‌ دیموکراتیـیه‌ت هه‌یه‌.

پاشـان دکتۆر نه‌جمه‌دین که‌ریم له‌ به‌شێـکی دیکه‌ی گفتوگۆکه‌دا باس له‌ مه‌سه‌له‌ی ده‌سـتور بۆ هه‌رێمی کوردسـتان ده‌کات و ده‌ڵێت ده‌مێـکه‌ کوردسـتان پـێویسـتی به‌ ده‌سـتور هه‌یه‌ تا کاری ئه‌و خه‌ڵـکه‌ دیاری بکرێت چ له‌ لایه‌ن حکومه‌ته‌وه‌ و چ له‌ لایه‌ن په‌رله‌مانه‌وه‌، هه‌روه‌ها زۆر گرنگیش بۆ دیاریکردنی شـێوه‌ی په‌یوه‌ندی له‌گه‌ڵ حکومه‌تی عێراقدا، چونکه‌ ده‌وڵه‌تی عێراق ده‌سـتوری هه‌یه‌ و ئه‌گه‌ر‌ هه‌رێمی کوردسـتان هه‌روا ده‌سـتوری نه‌بێت ئه‌وا له‌وانه‌یه‌ ئه‌و ده‌سـتوره‌ی به‌سه‌ردا بچه‌سپـێت و ئه‌وه‌ش به‌ پـێـچه‌وانه‌ی سـیسـتمی فیدراڵی‌یه‌، بۆیه‌ نووسینی ئه‌م ده‌سـتوره‌ و ڕیفراندۆم له‌سه‌ری کارێـکی باشه‌.

ده‌توانن گوێبیسـتی ده‌قی گفتوگۆكه‌ بن له‌ ڕێـگه‌ی كلیـكـكردنی ئه‌و فایله‌ ده‌نـگیـیانه‌ی ده‌سته‌ چه‌پ‌، ماوه‌كه‌ی 11:21 خوله‌كه‌.

بابه‌تی په‌یوه‌ندیدار

XS
SM
MD
LG