نه‌ته‌وه‌ یه‌كگرتووه‌كان بڕیارێـكی نوێ له‌ دژی ئێران ده‌رده‌كات

هه‌ر 15 ئه‌ندامه‌كه‌ی ئه‌نجومه‌نی ئاسایشی نه‌ته‌وه‌ یه‌كگرتووه‌كان له‌سه‌ر ڕانه‌گرتنی تاران بۆ به‌رنامه‌كانی پـیتاندنی یۆرانیۆم به‌ كۆی ده‌نگ ڕۆژی شه‌ممه‌ بڕیارێـكی نوێـیان له‌ دژی ئێران په‌سه‌ند كرد.

بڕیاری ژماره‌ی 1747 پاره‌ و پول و دارایی 28 كاربه‌ده‌ست و كۆمپانیا و داموده‌زگای ئێرانی سڕ ده‌كات، له‌وانه‌ بانكی سیباهی ده‌وڵه‌ت، فه‌رمانده‌كانی سوپای پاسداران و ئه‌و داموده‌زگایانه‌ی كه‌ له‌ ژێر كۆنتڕۆڵیاندایه‌. هه‌روه‌ها بڕیاره‌كه‌ كڕینی چه‌ك له‌ وڵاتی ئێران قه‌ده‌غه‌ ده‌كات.

بڕیاره‌كه‌ له‌ ئێران ده‌خوازێت داواكانی ئاژانسی نێونه‌ته‌وه‌یی وزه‌ی ئه‌تۆم جێبه‌جێ بكات و به‌رنامه‌كانی پـیتاندنی یۆرانیۆم ڕابگرێت و ده‌ست به‌ دانوسـتاندن له‌سه‌ر به‌رنامه‌ ناوه‌كیـیه‌كه‌ی بكاته‌وه‌.

شـایانی ئاماژه‌ پـێـكردنه‌ ئه‌م بڕیاره‌ نوێـیه‌ی دژی ئێران له‌ داڕشـتنی به‌ریتانیا و فه‌ره‌نسـا و ئه‌ڵمانیایه‌.

باڵیۆزی وڵاته‌ یه‌كگرتووه‌كانی ئه‌مریكا له‌ نه‌ته‌وه‌ یه‌كگرتووه‌كان ئه‌لیجاندرۆ ۆڵف گوتی بڕیاری 1747 په‌یامێـكی ڕوون و ئاشـكرا به‌ ئێران ده‌دات كه‌ ئه‌و هه‌وڵانه‌ی ده‌یدات بۆ به‌ده‌ستهێنانی چه‌كی ناوه‌كی هیچ ئه‌نجامێـكی نابێت ته‌نها ئه‌وه‌ نه‌بێت زیاتر گۆشه‌گیری ده‌كات.