بەگوێرەی وتەی چەند شایەتحاڵێک و کەسانی ئاگادار، ئەمڕۆ، شەممە، دەنگی تەقینەوەیەکی گەورە لە فڕۆکەخانەی ڕیازی پایتەختی سعودیە بیسترا، لەکاتێکدا کە هێرشی موشەکی حوسییەکانی یەمەن بۆ سەر سعودیە لە زیادبووندایە.
میدیاکانی حکومەت و دەستەڵاتی فڕۆکەوانیی مەدەنی سعودیە تاوەکو ئێستا هیچیان لەبارە ئەم رووداوە رانەگەیاندووە.
بەپێی ئاژانسی هەواڵی رۆیتەرز، فڕۆکەخانەی نێودەڵەتی شا خالید داوای لە گەشتیاران کرد کەپێش ئەوەی بەڕێبکەون بۆ فڕۆکەخانە پەیوەندی بە هێڵە ئاسمانییەکانەوە بکەن تاوەکو بزانن گەشتەکانیان هەڵوەشاوەتەوە یان نا.
هێڵەکانی ئاسمانی ئیتیحاد و قەتەری چەندین گەشتیان بەرەو فرۆکەخانەی ڕیاز هەڵوەشاندەوەو گەشتەکانیان تاوەکو رۆژی دوو شەممە ڕادەگیرێت.
تەقینەوەکەی ئەمڕۆ، رۆژی شەممە، لەپاش ئەو هێرشانە دێن کە هەفتەی رابردوو کرانە سەر فڕۆکەخانەی ڕیاز و کوژرانی چوار کەس و برینداربوونی چەندین کەسی دیکەی لێکەوتەوە و بووە مایەی تێکشکاندنی فڕۆکەیەکی سعودی.
ئەو هێرشانەش بوونە مایەی ئەوەی چەندین هێڵی ئاسمانیی گەشتەکانیان بۆ پایتەختی سعودیە هەڵبوەشێننەوە، ئەمەش لە کاتێکدابوو کە ڕیاز خۆی ئامادەدەکات بۆ پێشوازیکردن لە کۆنفرانسێکی گەورەی وزە و وەبەرهێنان.