ئەمڕۆ 43 ساڵ بەسەر ئەنفالکردنی هەزاران هاووڵاتی بارزانی لەلایەن حکومەتی پێشووی عێراقەوە تێپەڕ دەبێت و لەو یادەدا بەرپرسانی هەرێمی کوردستان داوای قەرەبوو بۆ قوربانیان لە حکومەتی عێراق دەکەن.
هاوکات، سەرۆکوەزیرانی عێراق سەرەخۆشی لە گەلی کورد کرد و گوتی ڕووداوەکە هەوڵێکی ڕژێمی بەعس بوو بۆ ڕاماڵینى ناسنامەی کورد.
نێچیرڤان بارزانی، سەرۆکی هەرێمی کوردستان، لە بەیاننامەیەکدا ڕایگەیاند، "جینۆسایدکردنی بارزانییان و گشت شاڵاوەکانی ئەنفال، برینی قووڵى نيشتمانن، بەڵام ئیرادەی گهلى كوردستانيان بۆ مانەوە و بەرگری لە مافە ڕەواکانی بەهێزتر کرد. لێرەوە جارێکی تر جەخت لەسەر ئەرکی ئەخلاقی و یاساییی حکومەتی عێراق دەکەینەوە بۆ قەرەبووکردنەوەی کەسوکاری ئەنفالكراوان و تهواوی قوربانییانی دەستی ڕژێمی پێشوو."
لە 31ـی حەوتی 1983 حکومەتی عێراق بە سەرکردایەتی سەدام حسێن فەرمانی ئەنفالی بارزانییەکانی دەرکرد و بەو هۆیەشەوە زیاتر لە هەشت هەزار ژن و پیاو و منداڵ برانە خوارووی عێراق و بێ سەروشوێن کران.
مەسروور بارزانی، سەرۆکی حکومەتی هەرێمی کوردستان، وێرای دەربڕینی خەمناکی و سەرەخۆشی لە کەسوکاری ئەنفالکراوەکان، دەڵێت، "پێویستە حکومەتی فیدڕاڵ ئەرکی دەستووری و بەرپرسیارێتیی ئەخلاقیی خۆی جێبەجێ بکات و بەشێوەیەکی شایستە قەرەبووی کەسوکاری قوربانییانی شاڵاوەکانی جێنۆساید و ئەنفال و هەموو کەسوکاری قوربانییانی دەستی ڕژێمی پێشووی عێراق بکاتەوە."
ئاماژە بەوەش دەکات، "پێویستە خەڵکی کوردستان ئەم تاوانانەی هەرگیز لە یاد نەچێتەوە و بزانێت کە گەلی کوردستان قوربانییەکی زۆر و بێوێنەی لەپێناو مافە ڕەواکانی داوە، بۆیە هەرگیز دەستبەرداری دەستکەوتە نەتەوەیی و نیشتمانییەکانی نابێت و بە هەموو شێوەیەک پارێزگارییان لێ دەکات."
عەلى زەیدى، سەرۆکوەزیرانى عێراق، بۆ کۆمەڵکوژیی بارزانییەکان پەیامێکى بڵاوکردەوە و ڕایگەیاند، "ئەم تاوانە، کە لە چوارچێوەی زنجیرەیەک سەرکوتکاری و هەوڵدان بۆ سڕینەوەی ناسنامە و بڵاوکردنەوەی ترس و دروستکردنی گۆڕی بەکۆمەڵ ئەنجام درا، لە کۆتاییدا شکستی هێنا لە شکاندنی ئیرادەی گەلی عێراق کە هەمیشە ستەم و دیکتاتۆریەتی ڕەت کردووەتەوە.
دەشڵێت، "پێزانینی بەرزمان هەیە بۆ ئەو قوربانیدانە مەزنەی کە لەگەڵ قوربانیدانی تەواوی عێراقییەکان بە هەموو پێکهاتەکانییەوە، بەشدار بوو لە هەڵهاتنی خۆری ئازادی و دامەزراندنی سیستەمی دیموکراتیی فیدراڵیمان؛ ئەو سیستمەی هەمووان لە سایەیدا مافە دەستوورییەکان و شکۆ و ڕێزیان بەدەست هێنا."