بە گوێرەی ئاژانسی هەواڵی ئەسۆشییەتد پرێس، ئەمڕۆ هەینی دادگایەکی تورکیا بڕیاری دا کۆمیدیانی ناسراو دەنیز گۆکتاش تا کاتی دەستپێکردنی دادگاییەکەی لە زیندان بمێنێتەوە، ئەویش بە تۆمەتی سووکایەتی کردن بە بەها ئایینییەکان و سەرۆک کۆماری تورکیا ڕەجەب تەییب ئەردۆغان.
گۆکتاش دوای گەڕانەوە لە گەشتی دەرەوەی وڵات، لە فڕۆکەخانەی سەرەکی ئیستانبوڵ دەستبەسەر کراوە.
لە یەکێک لە نمایشە کۆمیدییەکاندا، کە لە مانگی ڕابردوو تۆمار کراوە و زیاتر لە 9 ملیۆن و نیو جار لە تۆڕە کۆمەڵایەتییەکان سەیر کراوە، ئەردۆغان بە "دیکتاتۆر" ناوبراوە. گۆکتاش لە لێکۆڵینەوەکاندا وتوویەتی مەبەستی سووکایەتی کردن بە ئایین یان سەرۆک کۆمار نەبووە و وتەکانی تەنها لە چوارچێوەی گاڵتە و ڕەخنەی کۆمەڵایەتیدا بوون.
دوای بڕیاری دەستبەسەرکردنی، دەیان کەس لە دەرەوەی دادگا بۆ پشتگیری لە گۆکتاش کۆبوونەوە و دروشمی دژە حکومەتیان گووتەوە.
بەپێی یاسای تورکیا، سووکایەتی کردن بە سەرۆک کۆمار تاوانێکی سزادارە و سزای زیندانی تا چوار ساڵی بۆ دیاری کراوە.
ڕەخنەگران دەڵێن لە ماوەی دەسەڵاتداری ئەردۆغاندا ئازادی دەربڕین بەردەوام سنووردارتر بووە، بەڵام حکومەتی تورکیا جەخت لەوە دەکاتەوە کە دادگا و دەزگا دادوەرییەکان سەربەخۆ و بێلایەن کار دەکەن.