مەسرور بارزانی، سەرۆک وەزیرانی هەرێمی کوردستان ڕۆژی شەممە ڕایگەیاند پەیەوەندییەکی تەلەفۆنی، لەگەڵ شێخ ئەحمەد عەبدوڵا ئەلسەباح، سەرۆک وەزیرانی کوەیت ئەنجام داوە.
بارزانی لە ڕاگەیاندنەکەیدا دەڵێت لەو گفتوگۆیەدا "دۆخی گشتیی ناوچەکە و ئاڵۆزییەکان" تاوتوێ کراوە هەروەها نیگەرانی قوڵیشیان لەسەر"هێرش و گرژییەکان دەربڕی."
سەرۆک وەزیرانی هەرێمی کوردستان دەشڵێت لە گفتوگۆکەدا"جەختمان لە پێویستیی بەهێزکردنی هاوئاهەنگیی بۆ هێورکردنەوەی دۆخەکە و پاراستنی ئاشتی و سەقامگیریی ناوچەکە کردەوە."
ئەم گفتوگۆیە لە کاتێکدایە لەوەتای ئۆپەراسیۆنی ئەمەریکا و ئیسرائیل دژ بە ڕژێمی ئێران دەستی پێکردووە ئێران هێرشی مووشەک و فڕۆکە بێفڕۆکەوانەکانی بۆ سەر وڵاتانی ناوچەکە چڕکردووەتەوە، لە ناویاندا هەرێمی کوردستانیش.
ڕۆژی 28 ی مانگی دوو ئۆپەراسیۆنەکانی ئەمەریکا و ئیسرائیل دژ بە ڕژێمی ئێران دەستیپێکرد بە مەبەستی ڕێگری کردن لە ڕەفتارە شەڕانگێزەکانی ئێران لە ناوچەکە و سنووردارکردنی تواناکانی بۆ دەستڕاگەیشتن بە ئەتۆمی و بەرنامەی مووشەکی.
لە ئەنجامی ئەم ئۆپەراسیۆنە بەشێکی زۆر لە سەرکردە باڵاکانی ئێران کوژران بە ڕێبەری باڵای وڵاتەکە ئایەتوڵا عەلی خامنەییشەوە. سوپای ئەمەریکاش ڕایگەیاند، هێزی دەریایی ئێران لە ناو براوە.