سەرۆکی فەرماندەیی ناوەندی ئەمەریکا (CENTCOM) سەردانی ئیسرائیل دەکات و لەگەڵ سەرۆکی ئەرکانی سوپای ئیسرائیل و کۆمەڵێک فەرماندەی باڵای سەربازی لە تەلئەڤیڤ کۆدەبێتەوە.
بەپێی ڕاگەیەندراوێکی سوپای ئیسرائیل، براد کوپەر و ئەیال زەمیر سەرەتا کۆبوونەوەیەکی دووکەسی درێژخایەن و تایبەتیان لە ڕۆژی شەممە ئەنجامدا و دواتر کۆبوونەوەیەکی فراوانتریان لەگەڵ سەرۆکەکانی بەڕێوەبەرایەتی هەواڵگری و ئۆپەراسیۆنە سەربازییەکانی سوپای ئیسرائیل ئەنجامداوە.
سوپای ئیسرائیل ڕایگەیاندووە کۆبوونەوەکە دەرخەری پەیوەندی تایبەتی نێوان فەرماندەکان و پەیوەندییە ستراتیجییە نزیکەکانی نێوان سوپای ئیسرائیل و ئەمەریکایە و هەروەها پیشاندەری بەردەوامبوونی هاوکارییە بەرگرییەکانی نێوان هەردوو وڵاتەکەیە.
ڕاگەیەندراوەکەی سوپای ئیسرائیل بەبێ ئاماژەدان بە بابەتگەلێکی تایبەت کە باسکراون، جەخت لەسەر "بەهێزکردنی پەیوەندییە ستراتیجییە نزیکەکان" و "زیادکردنی هاوکاری بەرگری" لە نێوان هەردوولا دەکاتەوە و گەشتەکەی فەرماندەی سێنتکۆمیش بە هەنگاوێکی دیکە لە چوارچێوەی هەماهەنگی ئەمنی ئێسرائیل لەگەڵ واشنتن ناو بردووە.
میدیاکانی ئیسرائیل ڕایانگەیاندووە ئەم گەشتە هاوکاتە لەگەڵ بەرزبوونەوەی گرژییەکان لەگەڵ کۆماری ئیسلامی و هەڕەشەی دۆناڵد ترامپ، سەرۆک کۆماری ئەمەریکا بۆ کردەوەی سەربازی لە کاردانەوە بە سەرکوتکردنی خۆپیشاندەران لە ئێران و هەروەها هاوکاتە لەگەڵ ڕاپۆرتەکان سەبارەت بە ناکۆکی نێوان واشنتن و تەلئەڤیڤ سەبارەت بە هەنگاوەکانی داهاتووی ئاگربەستی غەززە.
لەماوەی چەند هەفتەی ڕابردوودا، سوپای ئیسرائیل ئاستی ئامادەبوونی خۆی بەرزکردۆتەوە و هاوکات ئامادەبوونی سەربازیی ئەمەریکا لە ناوچەکەدا بەهێزتر بووە. لە هەمان کاتدا فەرماندەی سێنتکۆم چەندین گەشتی بۆ وڵاتانی دیکەی ڕۆژهەڵاتی ناوەڕاست ئەنجامداوە بۆ هەڵسەنگاندنی دۆخی ئەمنی.