نێردەی تایبەتی ئەمەریکا بۆ سوریا تۆم باراک ئەمڕۆ هەینی ڕایگەیاند ئەمەریکا "پێشوازییەکی گەرم لەو ئاگربەستە کاتییە دەکات کە دوێنێ شەو لە گەڕەکەکانی ئەشرەفییە و شێخ مەقسودی حەلەب پێکهات و سوپاسی هەموو لایەنەکان دەکات، حکومەتی سوریا، هێزەکانی سوریای دیموکراتیک، دەسەڵاتە ناوخۆییەکان و سەرکردەکانی کۆمەڵگا بۆ ئەو خۆڕاگرتن و نیازپاکییەی کە ئەم ئاگربەستەی بەدوای خۆیدا هێنا."
باراک لە پلاتفۆرمی ئێکسیدا دەشڵێت " بە هاوکاری بەردەوام و کەرەمی ئەو تاکە خودایەی کە هەموو کۆمەڵگەکانمان دەیپەرستن، هیوادارین کۆتایی ئەم هەفتەیە ئاشتییەکی بەردەوامتر و گفتوگۆیەکی قووڵتر لەگەڵ خۆیدا بهێنێت."
باراک دەشڵێت "لەکاتی گێژاودا زۆرجار تروسکاییەکی نوێ سەرهەڵدەدات. ئەم ئاگربەستە دەستپێکردنی کارێکی گرنگە بۆ ڕێنماییکردنی ڕێگا جۆراوجۆرەکانی سوریا، پێکهاتەکانی و وڵاتانی دراوسێی بۆ ڕێگایەکی هاوبەش و ناوازە بۆ ئاسایش و گشتگیری و ئاشتی بەردەوام. ئاستەنگ دروست دەبێت، بەڵام ڕێگا هاوبەشەکەمان هاوکاری دەخاتە پێش ململانێ."
نێردەی ئەمەریکا جەختی لەوەش کردەوە کە ماندوو نەناسانە کاردەکەن بۆ "درێژکردنەوەی ئەم ئاگربەستە و ڕۆحی لێکتێگەیشتن بەدەر لەو کاتە دیاریکراوی کاتژمێر9ی بەیانی."