شاندی ئیمراڵی ئەمڕۆ دووشەممە لە شاری هەولێر لەگەڵ نێچیرڤان بارزانی، سەرۆکی هەرێمی کوردستان کۆبووەوە و پەیامێکی عەبدوڵا ئۆجەلانی، ڕێبەری زیندانیکراوی پارتی کرێکارانی کوردستان (پەکەکە) گەیاندە بارزانی.
پێشبینی دەکرێت بەم نزیکانە ئۆجەلان بانگەوازێک بۆ پڕۆسەی ئاشتی لە تورکیا ڕابگەیەنێت
شاندی ئیمرالی لە پەرلەمانتارانی پارتی دیموکراسی و یەکسانی گەل (پارتی دەم)، پارتی هەرێمە دیموکراتییەکان (دەبەپە) و پارێزەرانی ئۆجەلان پێکدێت.
هاوسەرۆکی پارتی هەرێمە دیموکراتییەکان (دەبەپە)، کەسکین بایندیر دوای کۆبوونەوەی لەگەڵ نێچیرڤان بارزانی، بە ڕۆژنامەنووسانی ڕاگەیاند، "سڵاو و خۆشەویستی بەڕێز ئۆجەلانمان گەیاندە بەڕێز نێچیرڤان بارزانی و پەیامەکەمان پێشکەش بە کاک نێچیرڤان بارزانی کرد. کاک ئۆجەلان گرنگییەکی زۆر بە بۆچوونی سەرۆک مەسعود بارزانی و نێچیرڤان بارزانی دەدات. "
بایندیر ڕایگەیاند، عەبدوڵڵا ئۆجەلان، ڕێبەری زیندانیکراوی پەکەکە، کار لەسەر چارەسەری "دیموکراتیک" دەکات بۆ ململانێی چل ساڵەی نێوان تورکیا و هێزە کوردییەکان.
گوتیشی "لە میانی دیدارەکاندا باسمان لە ئایندەی کورد کرا. باسمان لە چۆنیەتی پێشخستنی چارەسەر و ئاشتی بۆ گەلی کورد کرد، ڕۆڵ و بەرپرسیارێتی ئەکتەرە کوردییەکان لە پرۆسەکەدا چی بێت. گەلی کورد و گەلانی ڕۆژهەڵاتی ناوەڕاست پێشبینی دەکەن پرسی کورد لەسەر بنەمای دیموکراسی و یاسایی چارەسەر بکرێت. چارەسەرێکی دیموکراسی لە تورکیا کاریگەری ئەرێنی لەسەر باکوور و باشوور و هەر چوار پارچەی ڕۆژهەڵاتی ناوەڕاست دەبێت".
بایندیر هاوسەرۆکی دەبەپە ئاماژەی بەوەدا کە نێچیرڤان بارزانی هەڵوێستی نیشتمانی هەیە لەسەر پرۆسەی ئاشتی و "پشتیوانییەکی گەورە لەم پرۆسەیە دەکات".
هەروەها حکومەتی هەرێمی کوردستان دوای کۆبوونەوەکە ڕاگەیەنراوێکی بڵاوکردەوە و ڕایگەیاند، نێچیرڤان بارزانی سەرۆکی هەرێمی کوردستان سەبارەت بە "پرۆسەی ئاشتی" لە تورکیا ڕایگەیاند، "پرۆسەی ئاشتی دەرفەتێکی گرنگ و مێژووییە و نابێت لە دەست بچێت".
نێچیرڤان بارزانی گوتیشی: "هیوادارین پارتی بە شێوەیەکی ستراتیژی سەیری پرۆسەکە بکات و ئەم دەرفەتە لەدەست نەدرێت، هەمیشە هەوڵمان داوە پڕۆسەی ئاشتی بێتە ئاراوە و کێشەکان بە شێوەیەکی ئاشتیانە چارەسەر بکرێن، چونکە ئەزموونەکان دەریانخستووە کە شەڕ و چەک هیچ کێشەیەک چارەسەر ناکات".
شاندی نوێنەرانی پارتی دیم پێشتر لەگەڵ عەبدوڵڵا ئۆجەلان، ڕێبەری زیندانیکراوی پەکەکە لە دوورگەی ئیمرالی کۆبووەوە و دواتر لەگەڵ لایەنە سیاسییەکان، ڕێکخراوەکانی کۆمەڵگەی مەدەنی و گرووپە کۆمەڵایەتییە جۆراوجۆرەکان دەستیان بە کۆبوونەوە کرد.
شاندی ئیمراڵی لە ڕۆژی شەممەوە لە چوارچێوەی سەردانەکەیاندا بۆ هەرێمی کوردستان چەند کۆبوونەوەیەکیان ئەنجامداوە و دوێنێش لەگەڵ مەسعود بارزانی سەرۆکی پارتی دیموکراتی کوردستان لە هەولێر کۆبوونەوە.
بڕیارە ڕۆژی سێشەممە شاندەکە لە سلێمانی لەگەڵ بافڵ تاڵەبانی سەرۆکی یەکێتی نیشتمانی کوردستان و قوباد تاڵەبانی جێگری سەرۆکی حکومەت کۆببنەوە.
شاندەکە پێکهاتووە لە ئەندامانی شاندی ئیمرالی، پێرڤین بوڵدان، سری سورەیە ئۆندەر، هاوسەرۆکی دەبەپە، کەسکین بایندیر، ئەندامانی فەرمانگەی یاسایی ئەسرین، ئۆزگور ئەرۆڵ و ئیبراهیم بیلمەز، هاوسەر وتەبێژی کۆمیسیۆنی پەیوەندییەکانی دەرەوەی پارتی دیموکرات، بەردان ئۆزتورک، پەرلەمانتاران گوڵجان کاچماز سەیگیت و محەمەد کاماچ.
