بەریتانیا و یەکێتی ئەوروپا و هاوپەیمانەکانیان ڕۆژی دووشەممە هەڵبژاردنی سەرۆکایەتیی بێلاڕووسیان شەرمەزار کرد و بە "ساختە" ناویان برد، بەریتانیاش سزای بەسەر بەرپرسان و کۆمپانیاکانی بەرگریی ئەو وڵاتەدا سەپاند.
لە بەیاننامەیەکی هاوبەشدا کە لە ماڵپەڕی حکومەتی بەریتانیا بڵاوکراوەتەوە، ئوسترالیا، کەنەدا، یەکێتی ئەوروپا، نیوزلەندا و بەریتانیادا ڕایانگەیاند "ئێمە یەکگرتووین لە شەرمەزارکردنی هەڵبژاردنە ساختەکانی سەرۆکایەتی لە بێلاڕووس و پێشێلکارییە بەردەوامەکانی مافی مرۆڤ کە لەلایەن ڕژێمی بێلاڕوسەوە ئەنجامدراوە."
ئاماژەی بەوەشکردووە، "سزاکانی ئەم دواییە هەوڵێکی هەمەلایەنەیە بۆ لێپرسینەوە لە ڕژێمی ئەلکساندەر لوکاشینکۆ."
لوکاشینکۆ و کریملن هەریەکەیان ڕەخنەکانی ڕۆژئاوایان لە هەڵبژاردنەکە ڕەتکردەوە.
بەریتانیا دەڵێت بە هەماهەنگی لەگەڵ کەنەدا سزای بەسەر شەش بەرپرسی هەڵبژاردن و ئاسایشی دا سەپاندووە، لەوانە سەرۆکی کۆمیسیۆنی ناوەندی هەڵبژاردنەکانی بێلاڕووسیا.
هەروەها سزاکان سێ کۆمپانیا دەگرێتەوە کە تەقەمەنی و فڕۆکەی بێفڕۆکەوان و سیستەمی ڕادار و کۆنترۆڵکردنی چەک بەرهەمدەهێنن.
وەزیری دەرەوەی بەریتانیا دەیڤد لامی دەڵێت: "جیهان ڕاهاتووە بە بانگەشەی گاڵتەجاڕی لوکاشینکۆ بۆ دیموکراسی لە بێلاڕووس، لە کاتێکدا لە ڕاستیدا ئەو بە شێوەیەکی دڕندانە کۆمەڵگەی مەدەنی و دەنگە ناڕازییەکان سەرکوت دەکات بۆ ئەوەی دەسەڵاتی خۆی بەهێز بکات."
سەرچاوە: ڕۆیتەرز