Accessibility links

بەهۆی هێرشی درۆن لە چوارقوڕنە چوار کەس دەکوژرێن و کەسێکیش بریندار دەبێت


دوانیوەڕۆی ڕۆژی دووشەممە لە ئەنجامی هێرشێکدا لە ناحیەی چوارقوڕنە چەند کەسێک بوونە قوربانی.

کامەران عوسمان ئەندامی ڕێکخراوی سی پی تی ئەمەریکا بە دەنگی ئەمەریکای ڕاگەیاند،" هێرشەکە بەهۆی درۆنەوە بووە و داوێتی لە ئۆتۆمبێلێکی جۆری لاند کرۆزەر، کە 4 سەرنشینی تێدا بووە."

بە پێی زانیارییەکان سەرنشینەکان بریتی بوون لە دوو ژن و دوو پیاو هەرچواریان گیانیان لەدەستداوە.

وتیشی،" هەر لە ئەنجامی ئەو هێرشەدا جگە لەوەی چوار کەس گیانیان لەدەستداوە کەسێکی تریش بریندارە کە مۆتۆرسوارێک بووە و لە نزیک ئەو ئۆتۆمبێلە بووە. بەڵام ناسنامەی کەسەکان تا ئێستا نادیارە."

دەنگی ئەمەریکا پەیوەندی کرد بە چەندین لایەنی بەرپرس لە پۆلیس و ئاسایش، بەڵام وەڵامی پەیوەندیەکەیان نەدایەوە.

تا ئێستا لایەنە پەیوەندیدارەکان هیچ لێدوانێکی فەرمیان لەبارەی ڕووداوەکەوە نەداوە.

هەر بە پێی قسەی ڕێکخراوی سی پی تی هەر ئەمڕۆ کاتژمێر 11:30 خوولەکی سەر لەبەیانی فڕۆکەی بێ فڕۆکەوان بۆردوومانی گوندی شەهییەی سەر بە ناحیەی دینارتەی کردووە و بەو هۆیەشەوە دوو هاووڵاتی سڤیل کە هاوژینی یەکتر بوون گیانیان لەدەستداوە.

هەتا ئامادەکردنی ئەم هەواڵە هیچ کەس و لایەنێک بەرپرسیارێتی هێرشەکەی نەگرتووەتە ئەستۆ، بەڵام لە ڕابردوودا ئەمجۆرە هێرشانە ڕوویانداوە و زۆربەی جار تورکیا بەرپرسیارێتی خۆی لە ئەنجامەکان ڕاگەیاندووە و گوتویەتی ئەندامانی پەکەکەی تیادا کراوەتە ئەمانج.

XS
SM
MD
LG