وەزارەتی دەرەوەی عێراق ڕایدەگەیەنێت حکومەتی ئەمەریکا پەیامێکی گرنگی بۆ وەزیری دەرەوەی عێراق فوئاد حوسێن ناردووە.
وەزارەتەکە دەڵێت لە میانەی کۆبونەوەی ڕۆژی چوارشەممەی نێوان وەزیری دەرەوە فوئاد حسێن و باڵیۆزی ئەمەریکا لە عێراق ئالینا ڕۆمانۆوسکی پەیامێکی " گرنگ دراوە بە وەزیری دەرەوە".
فوئاد حوسێن کە یەکێکیشە لە دوو جێگرەکەی سەرۆک وەزیرانی عێراق، لە تویتێکدا بەبێ ئەوەی ئاماژە بە ناوەڕۆکی نامەکە بکات دەڵێت لەگەڵ خاتوو ڕۆمانۆوسکی کۆبوومەوە " نامەیەکی گرنگمان لە حکومەتی ئەمەریکاوە بۆ حکومەتی عێراقی پێگەیشت. نامەکە لەلایەن جەنابی سەرۆک وەزیران و لایەنە پەیوەندیدارەکانەوە تاوتوێدەکرێت و هەنگاوەکانی داهاتوو لەسەر ئەو بابەتە دەگیرێتە بەر."
ئەم نامەیە لە کاتێکدایە کە گرژییەکانی ناوچەکە بەهۆی شەڕی نێوان ئیسرائیلی هاوپەیمانی واشنتن و بزووتنەوەی حەماس کە لەلایەن ئێرانەوە پشتیوانی دەکرێت زیادیان کردووە و لە ماوەی ڕابردوودا هێزە چەکدارەکانی سەر بە ئێران چەندین هێرشیان کردووەتە سەر ئامانجەکانی ئەمەریکا لە ناو عێراق و سوریا.
زۆرێک لەو هێرشانە لەلایەن گروپی ناسراو بە مقاوەمەی ئیسلامی بەرپرسیارێتی گیراوەتە ئەستۆ، کە هاوپەیمانییەکی نزیکی گرووپەکانی پەیوەست بە ئێرانە و دژی پشتیوانی ئەمەریکایە بۆ ئیسرائیل لە شەڕی غەززە.
ئەمەریکا نزیکەی 2500 سەربازی لە عێراق هەیە و هەروەها نزیکەی 900 سەربازیش لە سوریا و ئەم هێزانەش لە چوارچێوەی هاوپەیمانێتی نێونەتەوەییدان بۆ لەناوبردنی تۆڕە تێرۆرکارییەکەی داعش.