بەپێی دەزگاکانی ڕاگەیاندنی ناوخۆیی فڕۆکەیەکی بێفڕۆکەوان کە گومان دەکرێت تورکیا بێت لە دوو هێرشی جیادا گوندی بۆکریسکانی لە بناری قەندیل بۆردومان کردووە و بە هۆیەوە ژنێک بە ناوی ئەستی محەمەد گیانی لە دەستداوە و پیاوێکیش بە ناوی میرزا ئیبراهیم برینداربووە.
بەپێی ئاژانسی دەنگوباسی فوراتی نزیک لە پەکەکە گوندەکە کراوەتە ئامانج و جگە لە زیانە گیانییەکان، زیانی ماددیش بەر گوندەکە کەوتووە.
دژە تیرۆری هەرێمی کوردستان لە ڕاگەیەندراوێکدا ڕایگەیاند " لە هێرشێکی جیادا فڕۆکەیەکی بێفڕۆکەوان لە شوێنێکی نزیک لە گوندی بۆکریسکان ئۆتۆمبێلێکی پارتی کرێکارانی کوردستانی کردە ئامانج و بەهۆیەوە دوو چەکداری پەکەکە کوژران."
لە ڕابردوودا گوندی بۆکریسکان لە بناری قەندیل چەندین جار کراوەتە ئامانجی بۆردوومانەکان و بووەتە هۆی کوژران و ئاوارەبوونی ژمارەیەکی زۆر لە گوندنشینان کە بەشێکیان ناچاربوون زەوییە کشتوکاڵییەکانیان بەجێبهێڵن.
هێرشی فڕۆکە بێفڕۆکەوانەکان بە پاساوی بوونی گەریلاکانی پارتی کرێکارانی کوردستان (پەکەکە) لە ناوچەکەدا بەردەوامن.