Accessibility links

یەکێک لە مەترسیدارترین گڕکانەکانی جیهان لە ئەندەنوسیا دەتەقێتەوە


گڕکانی مێراپی لە ئەندەنوسیا کاتژمێر 12ی نیوەڕۆی ڕۆژی شەممە تەقیوەتەوە.
بەپێی خەمڵاندنەکان هەورە خۆڵەمێشیەکان کە بەهۆی ئەو تەقینەوەیەوە دروست بووە لە هەندێک شوێن بەرزییەکەی گەیشتووەتە ٣ کیلۆمەتر.

دوکەڵ و خۆڵەمێشەکان کە بەهۆی تەقینەوەی گڕکانی مێراپیەوە دروست بوون، ئەو گوندانەی گرتۆتەوە کە دەکەونە پەراوێزی گڕکانەکەوە.

دەوترێت تەقینەوەی گڕکانەکە هیچ زیانێکی گیانی و برینداری لێنکەوتووەتەوە.

مێراپی بە بەرزی دوو هەزار و 963 مەتر، بە چالاکترین گڕکان دادەنرێت لە ئەندەنوسیا و یەکێک لە مەترسیدارترین گڕکانەکانی جیهانە.

ئەو هاوڵاتی و دانیشتوانەی کە لە 3 بۆ 7 کیلۆمەتر لە گڕکانەکەوە دوورن، ئاگادارکراونەتەوە کە چالاکییەکانیان ڕابگرن و ناوچەکە وەک ڕێڕەوی قەدەغەکراو بۆ هاتووچۆ ڕاگەیەندراوە.

ئەندەنوسیا دەکەوێتە سەر ئەڵقەی ئاگری زەریای هێمن و لە هەموو وڵاتێکی دیکە گڕکانەکانی زیاترە.

دوایین جار مێراپی لە ساڵی 2010دا بە شێوەیەکی توندوتیژ تەقیەوە و بەو هۆیەوەش زیاتر لە 350 کەس گیانیان لەدەستدا.

سەرچاوە/ڕۆیتەرز

XS
SM
MD
LG