سەرۆکی تورکیا ڕەجەب تەیب ئەردۆغان دەڵێت تورکیا نزیکەی 200,000 ماڵی نوێ لە هەرێمەکەی باشووری ڕۆژهەڵاتی وڵاتەکە دروست دەکات، کە بەهۆی بومەلەرزە وێرانکەرەکەوە زیانێکی گەورەی بەرکەوتووە.
لە 6 ی مانگی دوودا بومەلەرزەیەکی بەهێز بە گوڕی 7.8 لە تورکیایدا و بووە هۆی گیان لە دەستدانی زیاتر لە 41,000 کەس لە تورکیا و ملیۆنان خەڵکیش بێ ماڵ و حاڵ مانەوە.
ئەردۆغان گوتی نزیکەی 118,000 بینا یان ڕووخاون یان پێویستییان بەوەیە دەستبەجێ بڕووخێندرێن یان زیانێکی گەورەیان بەرکەوتووە.
بەڵێنیشیدا کارەکانی دووبارە بونیادنانەوە لە مانگی سێدا دەستپێبکەن و 199,739 ماڵ دروست بکەن، نزیکەی 130,000 لە هەرێمەکانی هاتای و کەهرامانماراس و مالاتیا دروست دەکرێن.
ئەردۆغان بەڵێنیشیدا " هیچ کام لەم بینایانە لە سێ بۆ چوار نهۆم بەرزتر نابن."
گوتی " بیناکان لەسەر زەوییەکی بەهێز و بە بەکارهێنانی شێوازی ڕاست دروست دەکرێن."
گوتیشی ماڵە نوێیەکان دوور لە هێڵەکانی هەڵەوە دروست دەکرێن و " نزیکتر دەبن لە شاخەکان." کە ئەمەش " لەو کێشانە دەیانپارێزێت کە بەهۆی زەوی فشەڵەوە دروست دەبن."
گوتیشی " لە ماوەی یەک ساڵدا دەست دەکەین بە گواستنەوەی ئەو هاوڵاتیانەمان کە لە خێمە و کۆنتێنەرەکاندا دەژین بۆ ماڵە نوێیە بەهێز و پارێزراوەکانیان."
ئەردۆغان وتیشی وڵاتەکە پەناگەی داوە بە نزیکەی 1.6 ملیۆن خەڵکە لە هەرێمەکەدا. گوتیشی تیمەکانی فریاکەوتن 114,834 کەسییان لە ژێر پاشماوەکاندا ڕزگار کردووە. هەوڵەکانی گەڕان و فریاکەوتن لە هەرێمەکاندا کۆتاییان هات، بەڵام ڕۆژی یەکشەممە لە هاتای و کەهرامانماراس بەردەوام بوون.
ئەردۆغان گوتی " ئەنتاکیا و ئەسکەندەرون و ئەرسوزێکی نوێ بونیاد دەنێین." ئەوەش وەکو ئاماژەیەک بۆ ئەو شار و شارۆچکانەی هاتای کە بەهۆی بومەلەرزەکەوە وێران بوون. شاری ئەنتاکیا دوای بومەلەرزەکە بە تەواوەتی وێران بووە، مزگەوت و کڵێسا کۆنەکانیشی کە دەگەڕێنەوە بۆ چەندین سەدە لەمەوبەر، لە ناوچوون.
سەرچاوە/ فرانس پرێس
