Accessibility links

پاکستان داوا لە ڕێبەری تاڵیبان دەکات دەست بەسەر چەکدارانی پاکستاندا بگرێت


هیباتوڵڵا ئاخوندزادە سەرۆکی تاڵیبانی ئەفغانستان

بەرپرسانی ئەفغانستان ڕۆژی شەممە ڕایانگەیاند، ئیسلام ئاباد داوا لە ڕێبەری باڵای تاڵیبانی ئەفغانستان دەکات دەست بەسەر چەکدارانی پاکستاندا بگرێت، دوای ئەوەی تەقینەوەیەکی خۆکوژی بووە هۆی کوژرانی دەیان پۆلیس لە مزگەوتێکدا.

لەوەتەی تاڵیبان لە کابول گەڕایەوە سەر دەسەڵات، پاکستان شایەتی بەرزبوونەوەی گەورەی هێرشەکانی ناوچەکانی هاوسنووری ئەفغانستان بووە، کە چەکدارەکان زەوییە ناڕێکەکان بەکاردەهێنن بۆ ئەنجامدانی هێرش و هەڵهاتن لە دۆزینەوە.

بەدواداچوونەکان یەکێک لە لقەکانی تاڵیبانی پاکستانیان بە هۆکاری تەقینەوەکەی ڕۆژی دووشەممە لە پێشەوا دەزانن کە بووە هۆی کوژرانی ٨٤ کەس لەناو بارەگایەکی پۆلیسی قەڵاداردا.

تاڵیبانی پاکستان ڕەچەڵەک و ئایدلۆجیای هاوبەشیان لەگەڵ تاڵیبانی ئەفغانستان هەیە، کە هیباتوڵڵا ئاخوندزادە سەرکردایەتی دەکات و لە حەشارگەی خۆی لە شاری قەندەهار لە باشووری وڵاتەکە فەرمان دەردەکات.

فەیسەڵ کەریم کوندی یاریدەدەری تایبەتی سەرۆکوەزیرانی پاکستان شێهباز شەریف ڕایگەیاند، شاندەکان ڕەوانەی تاران و کابول دەکرێن بۆ ئەوەی "داوایان لێبکەن دڵنیابن لەوەی خاکەکەیان لەلایەن تیرۆریستانەوە دژی پاکستان بەکارنەهێنرێت".

بەرپرسێکی باڵای پۆلیسی پاکستان لە پارێزگای خەیبەر پختونخوا کە تەقینەوەکەی ڕۆژی دووشەممەی تێدا ڕوویدا بە ئاژانسی فرانس پرێسی ڕاگەیاند کە شاندی کابول "گفتوگۆ لەگەڵ چینی باڵا" ئەنجام دەدەن.

ناوبراو کە نەیویست ناوی ئاشکرا بکرێت وتی: کاتێک دەڵێین بەرپرسی باڵا، مانای هیباتوڵڵا ئاخوندزادا سەرۆکی تاڵیبانی ئەفغانستانە.

لە ماوەی ٢٠ ساڵەی دەستێوەردانەکانی ئەمەریکا لە ئەفغانستان، ئیسلام ئاباد تۆمەتبار کرا بەوەی کە پاڵپشتییەکی شاراوەی لە تاڵیبانی ئەفغانستان کردووە تەنانەت لە کاتێکدا ئەو وڵاتە هاوپەیمانییەکی سەربازی لەگەڵ ئەمەریکا ڕاگەیاند.

بەڵام لەوەتەی لە ساڵی ٢٠٢١دا لایەنە کۆنەپەرستە سەرسەختەکان دەستیان بەسەر کابولدا گرتووە، پەیوەندییەکان لەگەڵ پاکستان خرابووە، بەشێکیش بەهۆی سەرهەڵدانەوەی تاڵیبانی پاکستانی کە بە تەحریکی تاڵیبان پاکستان ناسراوە (TTP).

پارتی TTP کە لە ساڵی ٢٠٠٧ لەلایەن چەکدارە پاکستانییەکانەوە پێکهێنرا کە لە تاڵیبانی ئەفغانستان جیابوونەوە، جارێک دەسەڵاتی بەسەر بەشێک لە باکووری ڕۆژئاوای پاکستاندا هەبوو بەڵام لە دوای ساڵی ٢٠١٤ بەهۆی هێرشێکی سوپای پاکستانەوە شکستی هێنا.

بەڵام لە ماوەی ساڵی یەکەمی دەسەڵاتی تاڵیباندا، پاکستان شایەتی زیادبوونی لەسەدا ٥٠ی هێرشە چەکدارییەکان بووە، کە لە ناوچە سنوورییەکان لەگەڵ ئەفغانستان و ئێران چڕبوونەتەوە.

لە ڕاپۆرتێکی ئەنجومەنی ئاسایشی نەتەوە یەکگرتووەکاندا لە مانگی ئایاری ٢٠٢٢دا ڕایگەیاندووە، ڕێکخراوی TTP کە بەناوبانگە بە تەقەکردن لە کچە خوێندکارە مەلالا یوسفزای، "دەتوانرێت زۆرترین سوودی لە هەموو گروپە توندڕەوە بیانییەکانی ئەفغانستان وەربگرێت لە دەستبەسەرداگرتنی تاڵیبان".

ساڵی ڕابردوو کابول نێوەندگیری دانوستانەکانی ئاشتی لە نێوان ئیسلام ئاباد و TTP کرد بەڵام ئاگربەستە داڕما.

سەرچاوە/ فرانس پرێس

XS
SM
MD
LG