بەرپرسانی کەرتی گاز لە تورکیا ڕۆژی پێنجشەممە ڕایانگەیاند کە ئێران بەهۆی کێشەی تەکنیکییەوە تا 10 ڕۆژ هەناردەکردنی گازی سروشتی بۆ تورکیا ڕاگرتووە، ئەمەش بووەتە هۆی ئەوەی دەسەڵاتدارانی تورکیا فەرمان بدەن بە کارگەی سوتەمەنی گاز بۆ کەمکردنەوەی بەکارهێنانی گاز بە ڕێژەی 40%.
بەرپرسانی تورکیا دەڵێن داوایان لە دابەشکارانی گازی سروشتی وڵاتەکەیان کردووە کە دابینکردنی گاز بۆ ڕێژەی %60 کەم بکەنەوە بۆ کاربەرە گەورەکان جگە لەوەی بۆ گەرمکردنەوە نەبێت، هەروەها بەرپرسانی ئەو وڵاتە گوتیان بڕیارەکە خوێندنگاکان و نەخۆشخانەکان ناگرێتەوە.
بەرپرسانی تورکیا دەڵین ئێران ئەو وڵاتەی ئاگادارکردوەتەوە کە بۆ ماوەی 10 ڕۆژە، ناردنی گازی سروشتی بۆ تورکیا ڕادەگرێت و دەڵێن بەڵام گفتوگۆکان بەردەوامن بۆ ئەوەی ماوەکە کەمتر ببێتەوە.
تورکیا بۆ دابینکردنی گازی وڵاتەکەی پشتی بە هاوردەکردنی گاز لە ڕوسیا و ئازەربایجان و ئێرانەوە بەستەوە.
بەپێی دوایین داتا فەرمییەکان، ئێران تەنیا لە دە مانگی یەکەمی ساڵی 2021دا 16٪ ی پێداویستی گازی سروشتی تورکیای دابینکردووە.
نرخی سووتەمەنی لە تورکیا بەهۆی دابەزینی بەهای لیرەی تورکییەوە لە بەرامبەر دۆلاری ئەمەریکادا، بە شێوەیەکی بەرچاوە بەرزبووەتەوە.