Accessibility links

هەلەو واشنتن: کشانەوەی هێزە شەڕکەرەکانی ئەمەریکا هاوکاتی هێرشەکانی داعش لە عێراق


پاش هێرشه‌كانی داعش بۆ سه‌ر سه‌نگه‌ره‌كانی هێزی پێشمه‌رگه‌ له‌ ناوچه‌ جیاكانی پارێزگای سلێمانی و كه‌ركوك و هه‌ولێر كه‌ بووه‌ هۆی گیان لەدەستدانی زیاتر له‌ ٢٠ پێشمه‌رگه ‌و هاوڵاتیانی سڤیڵ و برینداربوونی ژماره‌یه‌كی تر، حكومه‌تی عێراق و هێزه‌كانی پێشمه‌رگه‌ بڕیاریان داوه‌ پێكه‌وه‌ كاری ئاسایشی هاوبه‌ش بكه‌ن و ئۆپه‌راسیۆنی هاوبه‌ش به‌ ئه‌نجام بگه‌یه‌نن. به‌ تایبه‌تی له‌و ناوچانه‌ی كه‌ بۆشاییه‌كی ئاسایشی تیا دروست بووه‌، کە ماوه‌یه‌ك بوو په‌یوه‌ندی هاوبه‌شی ئاسایشی نێوان حكومه‌تی هه‌رێم و عێڕاق و پێكه‌وه‌ كار كردن له‌ دژی داعش تاڕاده‌یه‌ك نه‌مابوو.

به‌پێی راپۆرته‌ هه‌واڵییه‌كان، چه‌كداراكانی داعش ناوچه‌ جێناكۆكه‌كان‌ وه‌كو مۆڵگه ‌و شوێنی حه‌وانه‌وه‌ی خۆیان بەکاردەهێنن، هه‌ر له‌و ناوچانه‌شه‌وه‌ پلانی هێرشه‌كانیان دادەڕێژن‌ بۆ سه‌ر سه‌نگه‌ره‌كانی پێشمه‌رگه ‌و جار بەجاریش بۆ سه‌ر سوپای عێڕاق و هێزه‌كانی پۆلیس و حه‌شدی شه‌عبی هێرشەکانیان ئەنجام دەدەن.

ئه‌م گۆڕانكاریانه ‌و دروستبوونی شه‌ڕو شۆڕ له‌و ناوچانەدا‌‌ له‌ كاتێكدایه‌ كه‌ هێزه‌ شه‌ڕكه‌ره‌كانی ئه‌مەریكا و هاوپه‌یمانان بڕیارە تا كۆتایی ئه‌م مانگه‌ عێراق به‌جێده‌هێڵن.

به‌رنامه‌ی هه‌له‌و واشنتن میوانداری رۆژنامه‌وانی كه‌ناڵی ئه‌لحوڕه‌ له‌ سلێمانی ئه‌یوب ره‌زا و نوسه‌رو رۆژنامه‌وان ئه‌سعه‌د جه‌باری دەکات. هەردوولایان کۆکن لەسەر ئەوەی كشانه‌وه‌ی ئه‌مەریكا له‌ عێراق مه‌ترسییه‌كی گه‌وره‌یه‌.

ئه‌یوب ڕه‌زا باس له‌ مه‌ترسی ئه‌و كشانه‌وه‌ی هێزەکانی ئەمەریکا‌ ده‌كات و ده‌ڵێت ''كشانه‌وه‌ی ئه‌مەریكا مه‌ترسیەکی گەورەیە، جوڵه‌ و هەنگاوە سڤیڵییه‌كان له‌ عێڕاقدا گه‌وره‌ترین زیانیان به‌ر ده‌كه‌وێت، وەک خۆپیشاندان له‌ به‌غدا، سلێمانی و هه‌ولێریش زیانیان به‌رده‌كه‌وێت، هه‌موو شیعه‌کانیش له‌گه‌ڵ ئه‌و كشانه‌وه‌یه‌دا نییه‌، مانه‌وه‌ی ئه‌مەریكا به‌ڕای من زامنێكه‌ بۆ ئه‌وه‌ی شه‌ڕی نێوخۆ و ئه‌هلی له‌ عێراقدا ڕونه‌دات''.

ئه‌سعه‌د جه‌باری له‌ باره‌ی مه‌ترسی كشانه‌وه‌ی هێزه‌كانی ئه‌مەریكا ده‌پرسێ ''ئایا دوای كشانه‌وه‌ی سه‌ربازه‌كانی هاوپه‌یمانان و ئه‌مەریكا، بارودۆخی عێڕاق بته‌قێته‌وه‌ چی ڕوده‌دات؟ دڵنیام چ هه‌ولێرو چ به‌غداش زه‌ره‌رمەن دەبن. ئایا سه‌ركردایه‌تی سیاسی له‌ عێراق ئه‌و زیان ‌و پێشهاتانه‌یان وه‌كو خۆی خوێندووه‌ته‌وه؟ بۆی هه‌یه‌ تیرۆرو ته‌قینه‌وه‌كان بگه‌نه‌‌ هه‌موو شوێنێك''.

هیچ كه‌س به‌هێندی رۆژنامه‌وان ورد ناتوانێ هەڵسەنگاندنی باشی سه‌نگه‌ره‌كان بكات كه‌ سه‌نگه‌ری به‌رگرین و له‌ ناوچه‌یه‌كی پڕ مه‌ترسیدان، به‌ تایبه‌تی له‌ هێرشی چه‌ند رۆژی ڕابردووی هێزی پێشمه‌رگه‌ ده‌ركه‌وت كه‌ كه‌م و كورتی زۆر له‌ ئارادابوو، هه‌ر له‌ نه‌بوونی پێداویستی باشی چەک و تەقەمەنی، تا دەگاتە كه‌م و كورتی مه‌شق و ڕاهێنان، كه‌ له‌ به‌رنامه‌یه‌كی پێشووی هه‌له‌و واشنتندا، راوێژكارێكی باڵای وه‌زاره‌تی پێشمه‌رگه‌ لیوا به‌ختیار محه‌مه‌د دانی به‌وه‌دا نا كه‌ هێشتا پێشمه‌رگه‌ پێویستیان به‌ مه‌شقی زیاتر هه‌یه‌.

له‌و باره‌یه‌وه‌ ئه‌یوب ڕەزا سه‌رنجی به‌رپرسێكی ئیداری ده‌گێڕێته‌وه‌، كه‌ له‌به‌ر ئه‌مانه‌تی كاره‌كه‌ی نه‌یویست ناوی ئاشكرا بكات، ئه‌یوب ده‌ڵێت ''١٢٥٠ دینار بۆژه‌می به‌یانی و نیوه‌ڕۆ و ئێواره‌ی پێشمه‌رگه‌یه‌ك خه‌رج ده‌كرێت، ده‌بێت دۆخی پێشمه‌رگه‌ی سه‌نگه‌ر له‌ چیدا بێت، چه‌كی پێشكه‌وتوو له‌ ده‌ستی هێزه‌ تایبه‌تییه‌كان ده‌بینم، نه‌ك له‌ده‌ستی هێزی پێشمه‌رگه، ئه‌و چه‌كه‌ قورسانه‌ له‌ ده‌ستی‌ هێزی مۆرو ڕه‌ش و كۆماندۆ و دژه‌ تیرۆردا ده‌بینم، نه‌وه‌كو پێشمه‌رگه‌كانی سه‌نگه‌ر، باشترین چه‌ك و هه‌مه‌رو میلان وزریپۆش لای ئه‌وانه‌، موچه‌ی پێشمه‌رگه‌ ئه‌و په‌ڕی بگاته‌ ٦٠٠ هه‌زارو هه‌موو مانگێكیش وه‌ری ناگرن، له‌ به‌رامبه‌ردا موچه‌ی سه‌ربازێكی عێراقی نزیكه‌ی یه‌ك ملیۆن و شه‌سه‌د هه‌زارێكه‌ و هه‌موو مانگێكیش له‌ كاتی خۆیدا وه‌ری ده‌گرن، له‌و سه‌نگه‌رانه‌ ئێستاش پێشمه‌رگه‌ هه‌یه‌ به‌ چه‌كی خۆی پاسەوانی ده‌کات، نازانم ئه‌و هه‌موو چه‌كه‌ نوێ و چه‌كه‌ قورسانه‌ له‌كوێن، بۆ ئێستا باش نه‌بێت ئه‌ی بۆ كه‌یانه، سه‌یره‌ له‌وه‌دایه‌ كه‌ داوای چه‌ك و ته‌قه‌مه‌نیان له‌ هاوپه‌یمانان و عێراق كرد بێت، داوای زۆرترین فیشه‌كی ده‌مانچه‌ كراوه‌‌؟‌''.

سەربارەت بە سه‌ردانی كازمی و لێكه‌وته‌كانی و بڕیاردانی پێكه‌وه‌ كاركردن له‌و ناوچانه‌ی جێناكۆكن و داعش تێیدا سه‌ری هه‌ڵداوه‌ته‌وه‌، به‌رای هه‌ردوو رۆژنامه‌وانه‌كه‌، گرنگه‌ حكومه‌تی عێراق و هه‌رێم‌ پێكه‌وه‌ كار بكه‌ن و هاوپه‌یمانانیش له‌ رووی هه‌واڵگیری و هێرشی ئاسمانییه‌وه‌ هاوكاریان بكات،له‌ پێناو بنبڕ كردنی پاشماوه‌كانی چه‌كداره‌كانی داعش، سه‌باره‌ت به‌ سه‌ردانه‌كه ‌و بینینی وه‌زیری نێوخۆی هه‌رێم و وه‌زیری پێشمه‌رگه‌ له‌ جلوبه‌رگی قات وریباتدا له‌گه‌ڵ سه‌رۆك وه‌زیرانی عێراق و وه‌زیری به‌رگریدا.

ئه‌سعه‌د جه‌باری هیوا خوازه‌ بۆ له‌مه‌ودوا وه‌زیره‌كانی ئێمه‌ش ئەوا بن، ده‌شڵێت ''به‌خۆی سه‌ردانه‌كه‌ جۆرێك له‌ نمایش كردن بوو، تۆش نمایش بكه ‌و وه‌ك پاڵه‌وان ده‌ركه‌وه‌، دیمه‌نی وه‌زیری پێشمه‌رگه ‌و وه‌زیری نێوخۆی هه‌رێم به‌ فه‌رمانبه‌ر ده‌چوون''.

ئه‌یوب ره‌زا سه‌باره‌ت به‌ دروست بوونی زاراوه‌یه‌كی نوێ له‌ لایه‌ن حكومه‌تی عێراقه‌وه‌ بۆ ناوچه‌ جێناكۆكه‌كان كه‌ له‌ ده‌ستوردا ئاماژه‌ی بۆ كراوه،‌ ره‌نگه‌ له‌ ئاینده‌دا ببێته‌ دیمه‌نێكی تری ناكۆكی، هه‌رچه‌نده‌ وه‌ك ئه‌یوب باسی ده‌كات، له‌ ئێستادا هه‌رێم هیچ په‌رچه‌كردارێكی له‌هه‌مبه‌ر ئه‌و ناوهێنانه‌ نه‌بووه‌، به‌غدا ئه‌و ناوچه‌ كێشه‌ له‌سه‌رانه‌ی ناوناوه‌، "ناوچه‌ی هاوئاهه‌نگی ئه‌منی هاوبه‌ش"، ڕه‌نگه‌ حكومه‌تی هه‌رێم له‌م كاته‌دا نه‌خوازێت ئاڵۆزی دروست بكات كه‌ داعش سه‌نگه‌ره‌كانی پێشمه‌رگه‌ی كردووه‌ته‌ ئامانج و پێویستی به‌و هاوكاریه‌یه‌''.

please wait

No media source currently available

0:00 0:31:36 0:00



XS
SM
MD
LG