Accessibility links

فیستیڤاڵی بەرهەمە خۆماڵیەکان لە هەولێر


فیستیڤاڵی بەرهەمی ناوخۆ لە هەولێر

خاوەن كار و بەرهەمە خۆماڵیەكان و بەشێكی زۆر لە هاووڵاتیانی شار و شارۆچكە جیاجیاكانی هەرێمی كوردستان ئامادەی فیستیڤاڵی هەنار و ناساندنی بەرهەمە خۆماڵیەكان بوون بۆ كڕین و فرۆشتن و ساخبوونەوەی ئەو بەرهەمانە.

ئاراس مزوری بە بەرهەمەكانی دەڤەری بارزان بەشداری لە فیستیڤاڵەكەدا كردووە بە دەنگی ئەمەریكا دەڵێت " بەچل و پێنج بەرهەمی خۆماڵی بەشداریم لەم فیستیڤاڵەدا كردووە كە هەموویان بەرهەمی دەڤەری بارزانن وەكو هەنگوین و گوێز و سیسی و كەزان و بنێشت و تەحین و دۆشاو و كەشكە و ڕوونی ئاژەڵان و پەنیری كوردی و زۆر شتی تر، ئەم بەرهەمانە سودێكی زۆر بە ئێمە و خەڵكیش دەگەیەنن چونكە هەموویان خۆماڵین".

فیستیڤاڵی بەرهەمی ناوخۆ لە هەولێر
فیستیڤاڵی بەرهەمی ناوخۆ لە هەولێر

ئەوانەی كە بەرهەمەكانیان لەم فیستیڤاڵەدا ساخكردووەتەوە لە شارە جیاوازەكانەوە بەشدارببوون وەكو سلێمانی، هەڵەبجە، دهوک، هەولێر و دەڤەری بارزان و چەندین ناوچەی تری هەرێمی كوردستان.

بینەر تاهیر خاوەنی كارگەی بنیشتی كوردی لە هەڵەبجە بە دەنگی ئەمەریكای وت" زۆر بە باشی پێشوازی لە بەروبومەكەی ئێمە كراوە چونكە بەرهەمەكانمان بە تەواوی سروشتی و خۆماڵین، بەزۆری لەم فیستیڤاڵەدا لەبەر ئەوەی بە بەرهەمی خۆماڵی ناسراوە و فیستیڤاڵی هەناربوو و ئازاد هەڵەبجەیی جوتیارە نموونەكەی هەڵەبجە ڕێكیخستبوو هەناری هەڵەبجەیی و گوێزی هەورامان و ڕۆن و بادەمی كوردی و بنێشتی ئەسڵی كوردی و هەنگوین و هەنجیری خۆمان و بەرهەمەكانی تریشی تێدابوو و دەفرۆشران".

فیستیڤاڵی بەرهەمی ناوخۆ لە هەولێر
فیستیڤاڵی بەرهەمی ناوخۆ لە هەولێر

لە بەشێكی تری ئەم فیستیڤاڵەدا گرووپێكی خاوەن پێداویستی تایبەت بەرهەمەكانیان هێنابوو و كە هەموو ئەو كارە دەستیانەی ساڵانێكی زۆر لە ماڵەوە سەرقاڵی ئامادەكردنی بوونە نمایشیان دەكرد و بە خەڵكیان ناساند بۆ كڕین و فرۆشتن.

فیستیڤاڵی بەرهەمی ناوخۆ لە هەولێر
فیستیڤاڵی بەرهەمی ناوخۆ لە هەولێر

سروە جەباری چاڵاكوانی خاوەن پێداویستی تایبەت گووتی" وەكو گرووپی خاوەن پێداویستیە تایبەتەكان كارە دەستیەكانمان نمایش كردووە و سودێكی زۆری هەبووە بۆ ئەو خاوەن پێداویستیە تایبەتانە چونكە لە ڕووی مادی و مەعنەویشەوە سودێكی زۆری دەبێت بۆ ئەم توێژەی كۆمەڵگا كە كەلوپەلەكانیان دەكەنە داهاتێكیش بۆ خۆیان، دیوێكی تریش ئەوەیە كە ئەم خاوەن پێداویستیە تایبەتانە بەهرە و تواناكانیان پێشانی هاوڵاتیان دەدەن كە كاری وەها دەكەن زۆر كەسی تر ناتوانێت ئەنجامیان بدات".

فیستیڤاڵی بەرهەمی ناوخۆ لە هەولێر
فیستیڤاڵی بەرهەمی ناوخۆ لە هەولێر

ساڵانە ئەم جۆرە فیستیڤاڵانە لە پێش پاركی شانەدەری شاری هەولێر بەڕێوەدەچن و خەڵكیش ڕوو لە كڕینی ئەو بەرهەمانە دەكات هەم بۆ پێداویستی خۆیان و هەمیش بۆ ساخكردنەوەی بەرهەمی ئەو كەسانەی كە هەوڵی ناساندن و ساخكردنەوەی بەرهەمی خۆماڵی و داهینان دەدەن تا زیاتر ئاشنایەتی بۆ ئەو بەرهەمە خۆماڵیانە دروست بكرێت و سودی زۆریشی هەبێت بۆ كومەلگا و داهاتێك بۆ وڵات زیادبكرێت.

please wait

No media source currently available

0:00 0:04:27 0:00


XS
SM
MD
LG