Accessibility links

لە هەرێمی وان پاسێکی کۆچبەران وەردەگەڕێت و کوژراو و برینداریش هەیە


دیمەنێکی شاری وان

12 کەس دەمرن و 26 کەسیش بریندارن لە ئاکامی وەرگەڕانی پاسێک لە ڕۆژهەڵاتی تورکیادا.

زۆربەی سەرنشینەکانی ناو پاسەکە کۆچبەران بوون بەپێی لێدوانی کاربەدەستان بۆ میدیای خۆجێی لە پارێزگای وان و دەشڵێن درەنگانێکی ڕۆژی شەممە ئەو پاسە وەرگەڕاوە.

کاربەدەستانی تورکیا لە لێدوانەکانی ئەمڕۆ یەکشەممەیاندا ئاماژەیان بەوە کردووە "لەنێو ئەوانەی گیانیان لەدەستداوە، 11 کەسیان کۆچبەر بوون و یەکێکیشیان ئەو کەسە بووە کە یارمەتیدەربووە بۆ گواستنەوەی نایاسایی کۆچبەرەکان."

کاربەدەستان دەڵێن بریندارەکان گواستراونەتەوە بۆ نەخۆشخانە و خاوەنی پاسەکەش دەستگیرکراوە.

شاری وان دەکەوێتە نزیک سنوری نێوان تورکیا و ئێرانەوە و ئەم شارە وەک خاڵی پەڕینەوەی کۆچبەران دادەنرێت بۆ گەیشتن بە ئەوروپا و زۆربەی کۆچبەرەکانیش لە ئەفغانستانەوە بە ئێراندا خۆیان دەگەیەننە تورکیا تا لەوێوە بگەنە وڵاتێکی ئەوروپا.

لە مانگی 7ی ساڵی ڕابردوودا، بەلەمێک کە 60 کۆچبەری هەڵگرتبوو لە دەریاچەی واندا نوقم بوو.

XS
SM
MD
LG